股市今年三月開始的強勁反彈，預示復甦將至，來自商界的睇法，亦普遍認同經濟已經見咗隧道盡頭，上周新鴻基地產（00016）副主席郭炳江也預期，兩岸三地會是亞洲經濟最快復原的地區。然而，港府睇法是悲觀得多，預期下半年經濟未必有強勁回升之外，並大幅調低全年經濟預測，由原來的收縮2至3%，變為收縮5.5至6.5%，超出分析師預測收縮2至5%的下限。
港府睇錯市機會大
港府經濟團隊過往紀錄麻麻，預測經濟命中率同拋銀仔差唔多，今日香港經濟兩大支柱，股市同樓市氣氛大幅改善，但港府官員反而審慎得難以置信，同過往報喜不報憂態度截然不同，係真睇錯抑或希望talk down投資市場的熱度？後者層次高好多，但筆者睇嚟今次又係買大開細居多。
近期樓市升得相當誇張，樓價由低位回升超過兩成，距離海嘯前高位差距已經收窄到一成左右。經紀朋友話，唔少放盤一般時間的籮底貨都被一掃光，樓市好，筆者認為理由包括：過去一年迷債、滙控（00005）大瀉後供股，嚇走唔少購買力回到實物投資市場；其次，○八年新增供應唔多、息口低得離譜，以及銀行水浸日益嚴重，近期有迹象顯示，在個人理財及財資生意不易為之下，銀行更積極的承做息差變得吸引（拆息與P之間息差愈拉愈闊）的按揭生意，經常出現按揭估價高於成交價情況，使樓市火上加油。
熱錢流向二線地產股
筆者無水晶球去預測下半年樓市去向，但係身處資產泡沫膨脹期，不妨把握地產股升浪，近期熱錢有趨勢由一線地產股擴散到二線地產股，好似新世界（00017）同九倉（00004）等，尋日升幅都跑贏大市。
從恒生地產分類指數較資產淨值，由去年十一月中的折讓38%，到今日轉為19%溢價，相信資金遲早會向股價對比手上資產還有折讓的地產股埋手，查氏家族的香港興業（00480），或許有炒落後的條件。
作為中小型發展商，香港興業手上待售物業數量及規模，都及不上大發展商，所以在售樓策略及入帳進度方面，都很難和大發展商直接比較，要每年做到有一定賣樓盈餘撥入損益表唔易，故此，以手上資產價值與市值之間的價差衡量，比較中肯。
以現價3.07元計，香港興業市值41.5億元，比去年九月底中期報告所顯示的資產淨值103億元，折讓60%，儘管和去年海嘯最恐怖時期的82%折讓比較，收窄唔少，但回顧二○○○年樓市小陽春，香港興業折讓大約為30%，而過去十年平均折讓亦不過37%，這樣看來，現價應未充分反映樓市回暖的因素，如果折讓幅度收窄到37%，股價已可見4.8元樓上，現在才3元出頭，值博率都幾高。