熱錢不斷流入香港，金管局上周需多次注資，累計金額超過400億元，銀行體系總結餘達到2,500多億元，較五年前嘅高位還要高出數倍，「水浸」情況比想像中嚴重，致使金管局要加快發行外匯基金票據，吸收多餘嘅資金。
阿莊深信，熱錢來港，只是暫時停泊，最終目標仲係中國乃至其餘亞洲市場，主要係相信當地經濟有望最快從金融海嘯中復甦過來。而以目前歐、美市場情況來看，相信熱錢突然大舉徹離亞洲嘅機會唔大，區內資產價格易升難跌。
銀行水浸有利樓市
喺呢兩個月嘅升市之中，香港地產股表現算係落後，皆因本地經濟不景，投資者對地產股有戒心。殊不知，新樓供應有限、利息低企，加上銀行「水浸」，為物業估價趨向進取，這些都成為推動樓價向上嘅動力來源。
阿莊近日亦有落場睇樓，發覺二手樓價相當硬淨，唔少已重返金融海嘯前嘅水平；至於一手樓，承接能力亦比想像中好。然則，地產股資產水漲船高，估值應該有上調嘅空間。故繼銀行股發力之後，若然後市要再向上衝，不妨多加留意幾隻龍頭地產股嘅表現。
四通控股（00409）停牌，待宣布有關私有化之建議。有番咁上下炒股年資嘅投資者，都知十年前呢隻紅籌股曾經炒到飛天，但隨着科網熱潮退卻，股價低迷已有多年時間。再看另一隻中資股─五礦建設（00230），剛宣布二供一，昨日下午復牌，股價升逾一成。
可以見到，唔少靜咗好耐嘅中資股，都開始密謀新發展，朝住呢個方向，類似廣南（01203）、方正（00418）、越秀交通（01052）等股份，可以視為冷敲對象。
此外，國台辦最近推出八項惠台新政策，並同時重申，會全力支持福建省加快建設海峽西岸經濟區，三通股應聲上揚，其中廈門港務（03378）昨日急升10%，收報1.63元，剛好昨日亦為除淨日，股東們財息兼收，自然笑逐顏開。
兩岸交往轉趨頻繁，從事港口運輸，自必可以受惠。公司主營廈門港集裝箱裝卸及儲存、散貨裝卸以及港口配套增值服務。眾所周知，廈門港乃對台航運主要口岸，隨着海西經濟區形成，未來區內嘅航運需求將呈快速增長。
未來發展可塑性高
公司既擁有地理上的先天優勢，未來發展可塑性高。雖然今年業績仍受大環境，特別係外貿形勢所限制，但確立了長遠戰略地位，意義重大，股價已確認大轉勢，要重上2元關，應該冇難度。