尋日港股低開300幾點後，跌幅逐步收窄；於午市時段，恒指更加止跌回升，重返17,000點水平樓上。一如尋日所料，受惠天然氣漲價方案正式上呈，一眾燃氣股都見炒上，當中港華燃氣（01083）再升逾8%，收報2.62元。
事實上，近日市場資金輪流炒作消息股，尋日再有消息傳，國務院官員證實新能源扶持政策將會出台，相信繼尋日的燃氣股後，今日就會輪到新能源股落鑊，不妨從中尋寶。
尋日發改委指出，國家今年肯定可以實現「保八」，仲話雖然內地出口表現受外圍環境影響，但四月份內地的房屋和汽車銷售已出現不俗的增長。受消息刺激，尋日內房股表現同樣氣勢如虹，好似上海復地（02337）同碧桂園（02007）就分別上升15%以及14%。
順帶一提，今日係中國聯通（00762）最後一批107.55億股的股改限售股解禁，會否對聯通股價帶來衝擊，值得留意。