一個鐵一般嘅事實，從普通市民角度出發，無論係就業抑或營商環境，近兩月都係只有差沒有好。咁係咩因素吸引資金不斷流入香港，推動股、樓價格齊升？有人話，過去股市一般行先經濟表現六至九個月，如是者，近兩個月嘅升市，或暗示香港經濟已經見底，復甦之路在望云云。
後市六月見真章
講番股市，恒指上周終現疲態，萬七點關失守，上周五收市報16,790點，升249點。睇走勢，恒指會繼續喺萬六至萬七點水平上落，咁樣係讓大戶有足夠時間累積淡倉，等月尾期指結算殺落，抑或等大市抖夠氣再向萬八點關推進，阿莊亦睇唔通。不過如今內地因素舉足輕重，考慮到五月底六月初，對內地而言係一個較敏感嘅時間，相信此期間有必要保持經濟同股市穩定，免生事端，故好淡決戰，或要拖到六月才能分勝負。
美銀配售建行（00939）一事告一段落，唔少人認為，建行股價可以猶如早前中行（03988）配售舊股同滙控（00005）供股後嘅表現一樣，展翅高飛。但阿莊認為，今次建行配股是以傳統基金及中資金融企業為主要參與者，且事前亦未有出現嚴重超賣，故奉勸各位，類似建行呢類中資銀行股，長揸無妨，短線則別對號入座。
股價落後向前推進
再睇隻粵海投資（00270），呢兩個月股市累積可觀升幅，但粵投股價表現卻「斯人獨憔悴」，皆因其供水業務性質相對穩定，喺經濟不景之中，股價具防守性；但若經濟好轉，相比其他復甦概念突出嘅股類，股價表現會相對落後。
不過，上周大市調整，粵投股價終現異動，上周五高位曾見3.54元，收報3.51元，升6.69%。由於成交配合，加上市況反覆，避險意識加強，博其「遲來先上岸」，目標向3.8至4元關推進，穿3.1元止蝕。
此外，上周五阿莊推介嘅中油香港（00135），走勢相當唔錯，遂於大清早以平均價每股4.5元掃入10萬股，即市高位曾做4.93元，收報4.9元。但短線升勢似乎有點過急，若衝穿5元後有回吐，會考慮先走一轉。