美銀配售手上三分之一建行（00939）股份終於拍板，但人人都知你莫財，要出嚟變賣家當，自然唔會畀個好價錢你，結果每股定價4.2元，比周一收市價4.9元折讓一成四。今時今日金融強盜的胃口認真大，135億股一來一回（先沽空後補倉），帳面淨袋105億元以上，認真和味。
尋日批股有段小插曲，當時早市缸邊已盛傳，批股晒士相當奀，只得22億股，初時人人仲以為美銀惜貨逐少逐少沽（前晚行政總裁劉易斯咁啱得咁蹺話未來計劃保留大量建行股份），後來路邊社消息話，貨源來自另一中資機構，得22億股的建行股東是誰？今日應該有廣泛揣測。有趣的是阿爺連日打鑼打鼓，不惜搵友好中資單位落疊，準備承接美銀重量級配股，居然有人咁唔識趣打尖沽貨，莫非今日祖國咁進步，唔再講關係，變得咁鬼實際？
建行有追落後空間
睇番自三月初至今，三大國有銀行中，建行升32%，跑輸工行（01398）及中行（03988）的50%及40%升幅，如果批股陰霾消除，如果追得番工行，未來應該唔難有5至10%升幅，不妨留意。
金管局三度注資，周四銀行結餘曾升到2,422億元的歷史新高，水浸情況迫使任總出撒手鐧，將增發241億元外匯基金票據，抽乾部分游資。但幫助有幾大？恐怕要睇多幾日。
港股死都唔肯回吐，恒指尋日再升65點，收報17,153點，拋離50日線14,267點足足20%，超買情況可見一斑。史提芬仲係覺得，如果手上有唔少平價貨底，不妨考慮適量減持。
個市升到咁上下，史提芬不得不將視線由熱門股轉到落後雪茄尾股（cigar butts），留意到景福（00280）走勢唔錯，一來個人遊旅客並無受H1N1甲型流感影響，珠寶首飾店依然人頭湧湧，成為海嘯奇葩。其次係近排港交所（00388）股價愈升愈有，兩個月之間翻咗兩番，前日見過125.7元，係去年六月以來高位，揸住港交所的景福，帳面身家可望水漲船高。
景福去年九月底止半年賺4,175萬元，倒退五成五，但這非戰之罪，觀乎其銷售額及毛利，仍然有12%及24%增長，只係無咗前年沽港交所帶來的「其他經營收益」。
持港交所水漲船高
景福資產淨值8.1億元，大部分來自港交所股份及金飾存貨，市值2.56億元，折讓足足有六成八，個人體會係，香港零售銷售受金融海嘯的衝擊明顯比其他行業細，尤其主攻遊客生意的珠寶、化妝零售，即使景福今年只賺9,000萬元，市盈率2.8倍，加埋折讓夠大，現價買入係贏面大輸面小。