阿莊都係嗰句，每個投資者情況都唔同，投資要自己計自己數，畢竟點強嘅升市都好，總會有調整之時，因應情況及時調整組合，無可厚非。好似前日阿莊沽出嘅蒙牛乳業（02319），昨日回落5.7%，報15.22元，暫看應該冇走錯。
此外，昨日阿莊話會睇位沽出嘅四川成渝（00107），股價無端急升15.8%，收報2.41元。咁嘅升幅發生喺一隻公路股身上，有點不尋常，究竟公司醞釀乜嘢好消息，不妨拭目以待。由於阿莊買入四川成渝嘅價格只係1.54元，去到呢啲水平都想獲利，所以昨日以平均價2.4元沽出15萬股，獲利約12.7萬元。
如今，阿莊手頭貨量唔多，但並不代表係想清倉揸現金，只係手持嘅股票到咗心目中嘅價位，便先行獲利。若然嚟緊留意到心水股，會毫不猶豫入市，短線會密切留意中信泰富（00267）及騰訊（00700）。
工業股炒復甦概念
市場憧憬全球經濟觸底回穩，工業股嘅「復甦」概念突出，故見近期唔少工業股都先後被炒起，包括紙品股、紡織股、機械設備股等等。心血來潮，今日就睇睇隻紡織股申洲國際（02313）。
申洲主要從事製造及銷售針織服裝產品，去年公司實現收入48.2億元（人民幣．下同），按年增長31.9%；純利達到6.99億元，增長71.9%。年內，運動服裝佔收入嘅比重增至42.3%，而內銷佔收入嘅比重則為19%，每股盈利0.56元，公司派發末期息每股0.2港元，將於下周五除淨。
去年上半年生產成本上升，而下半年金融海嘯又帶來重大衝擊，但相比之下，申洲嘅經營表現算係幾唔錯。年內，公司加強與主要運動品牌客戶嘅合作關係，NIKE、Adidas、PUMA、Mizuno及FILA均為其客戶。另外，旗下嘅內衣服裝銷售額增長68%，隨着銷售額增至一定水平，產銷上嘅規模效益會漸趨明顯。
去年，申洲來自內地嘅收入由前年嘅3.94億元，倍增至9.17億元。隨着內地經濟逐步回暖，消費市場氣氛改善，公司加強內銷業務嘅成效可期。
去年，申洲嘅毛利率為23.8%，按年上升1.5個百分點，經營現金淨額7.55億元。截至去年底止手頭現金及等值2.38億元，每股資產淨值約2.3元。
近月，內地體育用品股升勢凌厲，主要係銷售表現理想。故可以預期，申洲嘅運動服裝製造業務，亦唔會差得去邊。以現價計，市盈率唔夠五倍，息率6厘。雖然今年以來股價已翻一番，但計落估值唔係貴，除淨前買入仲可博財息兼收。