尋日大市繼續反覆上落，恒指更一度失守17,000點水平，雖然最終收市倒升，重上17,000點之上，但成交就縮減至800億元樓下，部分藍籌股更有頗大跌幅。有消息指，內地有意設立國際板，吸引外資上市，市場憂慮此舉將打擊港交所（00388）未來發展，因此港交所尋日一度大跌8%，收市仍跌5.85%，報109.4元，成為全日藍籌跌幅之最，沽空金額亦達6.99億元，連續第四日高踞沽空榜首之位。
至於市場另一焦點，自然係美銀正式減持建行（00939）一事，唔少投資者都認為美銀落實減持，對建行來說不失為一件好事，最起碼少咗一重顧慮，所以消息一出，建行股價即時反彈，最終更升1.63%，收報4.98元。
個市升咗咁耐，熱門股份都炒得七七八八，資金開始見流入細價股，不妨從中尋寶。此外，尋日內地有報道指上海「雙中心」建設將步入快車道，更表示「凡是上海能做的，馬上就推，馬上就試」，有鑑於此，料上海概念股中線係較值得追捧嘅對象，故趁住大市調整之時，不妨留意。