青春女星郭奕芯（Ashina）、譚淇淇（KiKi）、李嘉琪及布睎尤食大餐預祝聖誕，單身的Ashina及KiKi笑言已「看破世情」，認為即使冇拖拍，約朋友慶祝一樣可以盡興。文：立影　攝：劉智源

布睎尤（左起）、譚淇淇、李嘉琪及郭奕芯狂擦聖誕大餐，食到舔舔脷！

Ashina（左）、嘉琪（右）及Raico圍實穿上聖誕裝的「威威獅令」合照，場面歡樂！場地：海洋公園

郭奕芯、譚淇淇、李嘉琪及布睎尤（Raico）相約到海洋公園食聖誕大餐預祝佳節，大快朵頤之餘，更隔着玻璃與各種魚類近距離接觸，心情格外興奮，難怪KiKi笑言今個聖誕最想學潛水，享受「水底樂」！

同朋友玩到癲

提到最難忘的聖誕節，KiKi表示去年單身已兩年，突然「Dry感大發」，創作了一曲《腐女X'mas》自我安慰，並閉關在家聽歌過節，但好動的她說：「其實都係一日啫！其餘日子都係約朋友去玩，有時飲醉咗要抖吓，我多數留喺屋企飲，出去都一定有幾個朋友陪，所以好安全！（今年有男仔約？）年年都有啦！唔使一定要拍拖，男同女都可以約我！」

去年自爆Dry的Ashina表示今年「睇開咗」：「識多咗新朋友，所以OK，可能又長大咗，覺得唔一定要出街玩。（想要浪漫聖誕？）想呀！但要睇身邊係咩人，唔心急，同朋友過都可以玩到好癲。（過白色聖誕？）冇錢呀！上個月生日已去咗旅行。」

難忘99支玫瑰

本月27日生日的Raico表示，經常會聖誕及生日一同慶祝，最難忘有年獲男友送贈99支玫瑰，浪漫爆燈！至於《中國好聲音4》香港代表嘉琪表示最難忘有年平安夜倒數在「Sorry」聲中度過：「我同朋友睇戲遲到，撞正平安夜倒數，大家都開心講『Merry Christmas』，我哋就講『Sorry，唔該借借！』好搞笑！」