前Cookies成員馬思恒退出娛樂圈，花八年時間讀了兩個碩士學位，成為持牌婚姻家庭治療師兼藝術治療師，正修讀博士學位的她自爆早年曾患抑鬱症，她希望以自身經歷回饋社會，將回流香港從事社區研究，幫助精神病患者。

Helena成為持牌婚姻家庭治療師兼藝術治療師，現正修讀博士學位。

Shine於2012年開騷，Helena（左二）與Cookies一班好姊妹亦有到來撐場。

在加州居住多年的Helena，與當地友人打成一片。

前組合Cookies早於2003年已解散，九餅各有各發展，有幾位甚至已結婚生子，馬思恒（Helena）在Cookies解散後遠赴美國加州繼續學業，早已是碩士生的她正修讀博士課程，在加州居住了將近八年的她，已計劃修畢博士學位後回流香港發展，幫助精神病患者，她說：「我讀咗兩個碩士學位，分別係婚姻家庭同藝術治療，當日揀選呢科都係因為自己嘅經歷。」

組合解散曾患抑鬱

Helena自爆當年Cookies解散後曾患上抑鬱，她說：「嗰時年紀細，Cookies嗰陣嘅生活淨係工作，好似我唯一嘅生命，突然解散冇咗工作，覺得迷惘，唔開心，好多時匿埋喺屋企，成日少少事就喊，情緒化，嗰時唔知（有病），依家睇番可能係輕微抑鬱，都持續咗半年至九個月左右。」最後她用畫畫、手工藝抒發情緒，走出抑鬱陰霾。

學有所成回饋社會

Helena現已是一位持牌婚姻治療師兼藝術治療師，在美國做過很多有關精神病治療工作，她說：「我第一個病患者係有嚴重精神分裂，近年見到多咗藝人肯出來講自己有抑鬱病、躁鬱症，係幾正面，西方文化同香港文化唔同，可能中國人比較要面子，覺得家醜不出外傳，其實有精神或情緒病係平常嘅事，因為人一生總會有某些情緒病，好正常嘅。」

早前她回港參加國際表達藝術治療協會國際會議，藉分享她的研究題目，在社區幫助精神病患者及情緒病人，希望他們不再被人標籤及歧視，她說：「雖然美國人工、機會都多啲，但美國好多人做緊呢樣嘢，我始終係中國人，香港係我成長嘅地方，我好想回饋社會。」

文：音樂組