莊思敏（Jacquelin）與王宗堯隔空對罵，愈鬧愈大，昨日王宗堯與何佩瑜（Jeana）出席新片開鏡儀式時，莊思敏即時冇影，Jeana則撥火：「搞宣傳又唔叫埋我」。王宗堯聞言即癮起，再寸Jacquelin是「後衞」，又即場「請教」Jeana如何應付「乞人憎嘅人」！

Jeana教王宗堯應無視「乞人憎嘅人」。

Jacquelin表示不擔心王宗堯拍片時動真火。

《導》片的台前幕後拜神，沒有邀請客串的Jacquelin。

王宗堯與莊思敏日前的互片，Jeana昨日加入「戰團」，成功「撥火」。昨日，王宗堯、Jeana與吳孟達等演員出席新片《導火新聞線》拜神儀式，電影開鏡前已是非不斷，分屬同門的男主角王宗堯與客串的Jacquelin隔空開火，Jacquelin自爆不受尊重，王宗堯公開炮轟對方不專業。Jeana笑言片名應改為《着火新聞線》：「老闆話搞宣傳，搞宣傳又唔叫埋我，3個人好玩啲嘛！（如果係真咁點？）咁我咪做和事老囉！盡人事啦！（莊思敏冇嚟開鏡喎？）佢唔想搶我鏡啫！」

日後要慎言

此時王宗堯行經Jeana身邊，聽到Jeana對未能加入「宣傳」感到不滿，即說：「你係演員，要明哲保身，咪做啲負面嘅宣傳。（老闆話係宣傳？）今日開鏡就宣傳，總之想件事快啲過去。」Jeana亦插嘴打圓場：「咁票房一定好啦！」問到拍《鴨王》與袁嘉敏爆不和時，她說：「嗰次真喎！」

繼「老臨論」後，王宗堯日前再以「足球論」暗寸Jacquelin「後衞打前鋒」，他昨日回應時再乘勢「狙擊」：「後衞仲未上場，我哋踢好啲畀分先，相信控制得到嘅。（Jacquelin話開鏡冇通知佢？）唔關我事喎！」講到興起的他問Jeana：「你遇到啲乞人憎嘅人會點？」Jeana說：「忍讓、大方同無視囉！」王宗堯「受教」後即無奈地說：「真係有一定難度，自己小心啲囉！經一事長一智，日後要慎言！」句句有骨。

唔想再有是非

另一邊廂，曾哭訴被王宗堯「斷衣食」的Jacquelin前晚與妹妹莊思明出席活動。問到會否出席昨日的《導》片開鏡拜神儀式？她坦言未有收到通知：「喺冇被邀請嘅情況下我唔會出席，我只係客串，唔一定要出席。（覺唔覺不被重視？）可能呢套劇比較多是非，唔想再有多啲是非，唔叫我都可以理解，唔會唔開心，客串冇乜所謂！」對於王宗堯指他倆有對手戲，勸她熟讀劇本，Jacquelin直言有接納意見：「我重複睇過，但唔見有。（幾時開工？）月尾，我開完工大家咪知有冇（對手戲）。」她更表示「真金不怕洪爐火」，即使對方動真火亦未驚過：「冇所謂，如果有我會有心理準備，唔會帶私人嘢喺工作度。」

採：影視組　

文：專案組