洪卓立昨日出席工展會活動時自爆因頸椎有問題，曾豪花近4千元更換合適的枕頭。提到向來膽小的女友湯怡聖誕節將到內地拍攝驚慄電影，因工作在身未能充當護花使者的他即表示要女友學獨立！

女友湯怡特意學烹飪為洪卓立煲湯進補，但洪卓立竟然逼女友學獨立，真係狠心呀！

湯怡與李司棋等嘉賓大合照。

歌手洪卓立（Ken）昨日出席《第50屆工展會》新聞發布會，他表示之前亦有到過工展會掃平貨：「一定會買嘢食，亦會睇吓有冇床褥、枕頭嗰啲。」他又透露為了找一個適合的枕頭而花費3、4千元：「我條頸本身麻麻，之前買過千幾蚊嗰啲又麻麻，幾十蚊都試過，依家就用泵氣嘅，高度可以調校。」問到可會與女友湯怡結伴前往，他指兩人會分開去：「佢都好慳家，但除咗嘢食嗰Part，大家睇嘅嘢唔同，佢會同媽咪去。」

讚車廂拖手型

聖誕將至，Ken透露湯怡要到內地拍戲，他亦有很多工作在身，故未能共度聖誕：「佢聖誕前已經去咗內地，返嚟都一月底、二月。（探班？）我諗我探唔到添呀！所以等佢學吓獨立，佢最驚都係一個人住酒店，驚污糟嘢，同埋今次對佢係最大嘅挑戰，要拍恐怖電影，我都唔知佢點喇！」提到天王郭富城在網上貼出與女友在車廂拖手的照片公布戀情，Ken覺得很有型：「可能佢係想保護女仔，兩個人影張相公開又好核突，依家幾型！（你公布婚訊都咁做？）唔會，公布婚訊同公布戀情唔同，嚴重啲嘅。」

煲湯進補

另外，湯怡昨日與李司棋、石修等擔任節目嘉賓，她透露自Ken數年前病倒入院後，特意學烹飪為對方煲湯進補：「會提佢食核桃，但佢不嬲唔食呢啲嘢，所以要氹吓佢。」而曾與城城合作電影的她表示未見對方在片場經常玩電話。

文、攝：音樂組