樂隊movin'日前舉行一年一度的音樂會，五子跟歌迷大玩近距離接觸，更落力演出！雖然主音袁學謙再次走數冇騷肌，但他當日帶病上陣，發燒都頂硬上，非常專業！ 文：音樂組　攝：林蔚恩

movin六位成員穿睡衣獻唱，不過只有阿謙做全套！

movin特意在咖啡室開騷，希望能與歌迷有更好的交流。

樂隊movin'日前在旺角樓上咖啡店舉行音樂會，五子以睡衣Dress Code上陣，亦有歌迷穿睡衣到場。音樂會上他們表演多首歌曲，除了獻唱自己作品外，亦翻唱其他人作品，如容祖兒及楊千嬅的歌曲，期間又邀請歌迷上台合唱及安排點唱環節，氣氛熱烈！他們更率先在音樂會上獻唱新歌Demo，最後以《十萬個如果》作結。

笑Fans打喊露

提到今次是第三次開騷，主音袁學謙自爆帶病上陣：「今朝起身發覺發燒，把聲都有少少萌。（病咗都頂硬上？）因為呢個騷籌備咗半年，就算身體唔好，都係自己責任，總之On Show要做番100分。」談到睡衣Dress Code，他們笑言其實一套睡衣並不便宜，阿謙笑說：「太貴我哋Band仔買唔起，所以得我有全套，佢哋每人半套！」他們透露今次開騷想跟歌迷更親近：「今次特登揀可以同歌迷好近好近接觸嘅場地，今次近啲就可以睇到晒佢哋嘅眼耳口鼻，打喊露、打乞嚏都睇到晒，感覺好唔同！」

發燒都要死頂

問到騷前阿謙曾預告會騷肌，其他成員更煽動歌迷可以摸他，但今次阿謙繼上兩次音樂會後再次走數，他死撐：「唉！我本身想，但我病咗，睇個形都睇到嘅！（唔驚走數畀人鬧？）應該冇事嘅！」其他成員亦突然良心發現：「佢冷親就唔好，畀佢着番多少少衫。」至於下次開騷可會想在更大的地方舉行？他們說：「要再諗諗，睇吓今次完咗歌迷嘅意見點先，嚟緊我哋12月都會有新搞作。」他們又預告明年會推出首隻實體碟。