張紋嘉（Crystal）再度夥拍導演梁榮忠參演舞台劇，由生活演到劇場內，將「Dry爆」中女演得出神入化！而梁榮忠則激讚Crystal演技和態度一流，揚言下次開拍電影一定預埋佢！ 文：音樂組　攝：吳文聰 服裝：Monki

張紋嘉在劇中扮演潑辣中女，唔通因為「做自己」，所以特別入戲？

梁榮忠（左）十分賞識張紋嘉，更「欽點」她演下齣戲。

張紋嘉綵排時表情多多，對舞台劇已累積了不少經驗。

歌手張紋嘉自2011年始進軍舞台劇界，短短四年間已經參演了九套劇，而下月初公演的舞台劇《斷到正》更再度與梁榮忠合作，問到Crystal舞台上的表現，梁榮忠即大讚：「梗係好啦！就係第一次合作得愉快，先會有第二次合作，新演員嚟講佢拿捏得好好，我準備下個關於電影嘅製作會再邀請佢。」不過梁榮忠又笑言再找Crystal合作亦是一個「艱難」的決定：「因為佢第一次合作時喺台上笑咗場，所以我今次真係好冒險！不過演員除咗技巧，都要有態度，Crystal喺呢方面真係好好，相信過多兩、三年，電視同舞台需要佢！」

多年來冇愛滋潤

Crystal透露在《斷到正》中飾演一個「乾到龜裂」的潑辣中女，更因為單身太久，無聊到與友人一齊捉姦，並引發一場「搵男朋友大賽」。談到剛踏入30歲的Crystal可會受舞台劇激發，現實中主辦一場搵男朋友大賽？她笑說：「我搞比賽，咁邊個嚟參加？我真係冇咁嘅膽量，同埋我真係唔係好主動嘅人，我從來都冇試過同人表白。」梁榮忠笑指就是看中Crystal多年來缺乏愛情滋潤的特質，才適合做這個角色，令Crystal哭笑不得！

30歲是人生開始

Crystal認為過了30歲才是人生新開始，有些角色是需要有歷練才會發揮得好，為了掌握演藝技巧，她早前上演藝訓練班，開始明白揣摩角色是怎麼一回事。提到梁榮忠指開拍電影點名預她，Crystal即大表感激：「機會唔係想要就會嚟，好需要把握，所以要學習自己搵角色。」