女歌手JW（王灝兒）離開黎明公司轉投新公司，復出新歌即大受歡迎，新歌講述女仔拍拖多年的恨嫁心聲，JW亦自認對婚姻有憧憬，希望將來生夠12個仔女！

在歌壇邁出新一步的JW，歌曲大受歡迎之餘，連天后祖兒都Like！

JW自幼對婚姻有所憧憬，更大想頭要生12個仔女！

原來新歌的題材是由JW提議，難怪唱得特別有感情！

轉投新公司的JW再戰樂壇，新歌《矛盾一生》在網上反應極佳，歌曲講述一對情侶拍拖多年，但在婚姻上取不到共識，男友拖字訣令女孩傷透心，JW認為歌詞令不少女士產生共鳴，大讚作詞人陳詠謙的歌詞非常到肉！

錄音唱到喊

JW表示看到歌詞已被感動，錄音時更唱到喊！她說：「其實係我提議用呢個題材，會Hit中好多20幾、30幾歲女仔嘅心聲，我都有少少呢類經歷嘅，好多時男仔慢過女仔成熟，女仔青春有限，男就愈老愈襟，女仔心入面有好多矛盾，究竟等唔等佢改變好？我諗係要睇當時另一半肯唔肯改，呢啲冇得逼，要個男仔好愛你，想同你建立家庭。」

新歌講及結婚，JW自認自小已對婚姻有憧憬：「我鍾意睇童話，覺得一定要結婚，希望30歲前生第一個BB，仲有5年時間，要再努力尋覓吓，我細個想生夠12個仔女，不過依家知道係好貴！」

獲祖兒欣賞

JW於2010年被黎明發掘加入娛樂圈，一鳴驚人，曾與衞蘭合唱《男人信什麼》奪得金曲金獎，但近年步伐放慢，JW沒有埋怨舊公司，認為吸收了許多寶貴經驗，現在會更珍惜每個機會，今次復出新歌大受歡迎，令她格外感動：「得到好多朋友支持，好鼓舞，最開心係見到容祖兒都轉載我嘅歌，真係好大嘅強心針！依家唔會想拎咩獎，只係想同公司、作曲作詞人好好溝通，唱啲自己有信心嘅歌回報大家。」