羅霖立平安紙 三兒媳平分身家

羅霖、朱慧敏、靚太何倍倩和陳君宜等昨晚出席由「香港珠寶製造業廠商會」主辦的《2015珠寶小姐》競選總決賽。擔任評判的羅霖打扮性感，並戴上七位數字的珠寶。她透露對珠寶設計有興趣，或者將來退休去修讀珠寶鑑證，至於有否收藏珠寶？她說：「我多數收藏錶，同埋翡翠玉器，珠寶太貴喇！都係實際啲儲錢買樓。名貴珠寶都係放喺保險箱，最貴係七位數字鑽飾。翡翠玉器好值得收藏，因為愈來愈少，升值潛力大，我媽咪鍾意翡翠影響到我都鍾意。（留畀囝囝同新抱？）會呀！我全部嘢都會留畀我三個仔同新抱，包括我啲名牌手袋，我保存得好好。錢財身外物，又帶唔走，會畀佢哋三個平均分，唔會偏心。我連平安紙都諗咗點寫，呢個係新潮做法，唔係有咩事，我啲仔拎唔到我啲錢，我依家已經同律師講定，未雨綢繆。」

何倍倩激罕晒線

而何倍倩罕有大騷三吋事業線，對於被指很性感，她說：「我接受到嘅程度，啲人好少會話我性感，都係話我骨感多，話我好瘦，我係食極唔肥，同埋我鍾意做運動，都有試過增肥。試過連續幾星期晚晚食兩隻蛋，後嚟老公知道咗就叫我咪再食，話我未增肥成功，已經膽固醇超標。」朱慧敏則透露未有新戀情和追求者，目前專注工作。