鍾嘉欣曾傳被星夢掟入雪櫃，令吳若希（Jinny）搶贏做一姐，惟唱片公司高層何哲圖對她始終抱有「一顆不變的心」，自嘉欣宣布單身後再度得寵，獲揼本十萬元拍攝兩首MV。而Jinny則被閂水喉，慘與胡鴻鈞「瓜分」MV。 文：音樂組

再度得寵的嘉欣高舉勝利手勢，坐正做一姐！

何哲圖親臨片場探嘉欣，錫到出晒面。

吳若希與胡鴻鈞兩首歌一齊拍MV，「典解嘅」？

鍾嘉欣與吳若希一直盛傳爭寵爭出面，去年Jinny獲唱片公司CEO何哲圖（Herman）寵愛爬頭搶走「星夢一姐」寶座，但自嘉欣與伍允龍分手後重新被點名力捧，短時間內工作量急增，冇份拍劇都可主唱無綫劇《無雙譜》插曲及《東坡家事》主題曲。

Herman親臨探班

嘉欣最近獲公司豪擲十萬元拍攝兩首MV，其中一首是劇集《武則天》插曲《不顧一切》，雖然《武》劇已在七月播畢，但事隔四個月仍獲公司「翻炒」重新拍攝，穿低胸長裙的嘉欣在MV舉V兼晒事業線！而她拍攝《張保仔》插曲《一顆不變的心》MV時更獲Herman探班！失寵的Jinny待遇明顯有別，新歌《我們都受傷》要與同門胡鴻鈞的《明知故犯》MV二合一，有被閂水喉之嫌，Herman亦未有探班。

「後輩」望合唱叨光

本報致電Herman，他說：「難得嘉欣正式唱番歌，當然要全力支持，去探班都係想佢穩定啲，同埋當日好忙先冇去探Jinny，佢同其他歌手拍MV我都有去。（係咪幫佢首歌爭勁歌總選『金曲金獎』？）唔係，希望佢哋兩首歌都爆出！」至於嘉欣對舊歌《不》獲重拍MV則表示Surprised：「首歌受歡迎咪拍多次。（撼低Jinny？）唔可以咁講，都鍾意佢啲歌。」而問到Jinny有傳失寵一事，她以三次「典解嘅」回覆：「其實我個MV都唔失禮，玩新Idea，連張敬軒都讚。（輸畀嘉欣？）咁要同Herman反映吓，要同嘉欣合唱叨吓光，不過論年紀同年資我的確細過佢，佢係前輩嚟。」