楊思琦昨晚出席活動時，被問到10年前與鍾嘉欣在番禺拍劇期間，某夜唱K後遇襲一事，她指事件是她人生最接近死亡的一次，留有陰影之餘也有後遺症，又否認傳聞所說曾被性侵犯。

楊思琦

千嬅得悉思琦十年前遇襲後非常驚訝。

楊思琦10年前與鍾嘉欣（Linda）、陳浩民及唐文龍等在番禺拍無綫劇《人生馬戲團》期間往唱K消遣，離開時傳被當地賊人打劫，更傳思琦和嘉欣失蹤數小時。

思琦昨晚出席活動時再被問到該事件，她猶有餘悸地表示事發經過和內容均和Linda所說的一樣，她指唐文龍事發時在場，但不記得陳浩民是否在場。問到是否無綫高層樂易玲不准提及此事，她說：「嗰時公司係唔可以講，依家都過咗10年，Linda都講咗佢嗰Part。（你哋匿咗兩個鐘？）匿咗幾耐真係唔知，係人生最接近死亡嘅一次。」

事後發噩夢

對於有傳她和Linda失蹤期間曾遭性侵犯，她說：「梗係冇啦！如果係咁我哋個人都冇埋喇，命都冇，仲點會畀我哋走得甩，真係生死邊緣。（後遺症？）會有陰影，依家夜晚出街都會驚，會留意啲Van仔開門聲，事發後有發噩夢，覺得內疚無奈，因為大家係同我慶祝生日，幾個幕後人員都受咗傷，畀人斬傷手腳流晒血。（怕咗返內地工作？）我成日要返內地，除咗嗰次嘅事，好彩冇其他更嚴重嘅事發生。」唐文龍昨日受訪時談及遇襲原因：「好似話嗰間K店因帳單問題同客人有拗撬，嗰個客人心有不忿，就趁K店收舖，拉隊去教訓啲員工，點知中咗我哋。」

千嬅震驚

與思琦同場的楊千嬅對於思琦遇襲一事全不知情，得悉後即頻呼很驚。此外，問到可有收藏珠寶，她表示有收藏丈夫送她的RM系列珠寶，她會傳給仔仔，問到可會留給新抱，她笑說：「睇吓個新抱點，自己都後生過，唔會逼個仔要揀啲咩人。依家我要多啲陪佢，開始潛移默化等佢第時揀啲似阿媽咁嘅，應該唔會太走樣。」

文：名人組