43歲的「靚媽」陳慧琳（Kelly）將於下月駕臨紅館，揚言要挑戰入行廿年的性感底線，「戰衣」Deep V開到落肚臍！她笑言屆時性感跳舞的Dancers要在Nude Bra上寫名，方便不慎「飛Bra」後認領。

穿Bra Top排舞的Kelly大晒玉背。

Kelly笑言在Nude Bra上寫名，方便「飛Bra」後認領。

患病的Kay戴黑超口罩出席記者會。

陳慧琳下月18至26日在紅館舉行一連九場的《陳慧琳let's celebrate!世界巡迴演唱會》，Kelly日前排舞，僅穿着Bra Top大晒玉背，她透露今次開騷的服裝設計是入行20年來史無前例的性感，豪擲500萬打造六至七套超性感服飾：「今次完全唔抗拒性感，都可以話係嚟一個突破，睇草圖嗰時都睇到嘩嘩聲。到時有件衫會開胸開到落肚臍，係我入行以來最性感。」

拉筋痛到似癱咗

她又笑說最擔心不慎走光：「跳舞嗰時會小心唔好喺台上飛Bra ，我已經叫定到時會一齊性感跳舞嘅舞蹈員啲Nude Bra要寫名，到時邊個跌咗都可以認得番。」Kelly表示起初練舞時要進行地獄式拉筋，痛到似癱咗。

Kelly昨日再為演唱會綵排，穿運動裝的她大晒23吋纖腰，又說：「有時返到屋企都想自己繼續練，不過一練囝囝就抱住我隻腳冇得練。」問到老公可有幫她按摩？她說：「佢有幫我搓過兩下，佢好大力然後又話攰，沖熱水涼好過，囝囝都有幫我整幾下。」

謝安琪嗌到失聲

此外，另一位天后謝安琪（Kay）上月剛完成巡唱澳門首站，即將展開瀋陽、廣州、上海等各站，並暫定四月返香港舉行終點站。而昨日她出席《十大中文金曲頒獎禮》記者會，患病的她全程戴黑超口罩，其經理人夏森美說：「之前因白只攞獎而太過激動嗌得太大聲出事，可以話係失咗聲，尋日（前日）商演都要去打開聲針。」

文：音樂組

攝：林蔚恩