近日屢傳婚姻亮紅燈的Neway太子爺薛嘉麟和名模諸葛紫岐仍未正式交代，但昨日難得有共同假期，二人一心陪囝囝出外遊玩，豈料途中突然被數名記者攔途截住狂影，嚇得囝囝受驚爆喊，甚少受訪的薛嘉麟愛子心切而開腔怒斥情況危險及破壞一家人的美好假期。

薛嘉麟與諸葛最錫囝囝，故對大好假期被破壞而感到憤怒。

諸葛早前出活動時身形暴瘦，又屢傳婚變，昨日難得一家三口遊玩，卻遇上不快。

名模諸葛紫岐（Marie）與Neway太子爺薛嘉麟結婚三年，近日屢傳婚姻亮紅燈，據知各有各忙的二人昨日趁有共同假期，帶囝囝薛華轁「冰岐麟」到公園玩樂，可是途中被記者衝到車前狂影，令甚少接受訪問的薛嘉麟，在婚變傳聞的敏感時期透過電話開腔指摘！

破壞大好假期

薛嘉麟直斥此舉影響囝囝情緒，可見二人無論發生任何事，仍有以照顧及愛護囝囝為先的共識。他講述事件始末：「每當我哋架車停低等交通燈嘅時候，佢哋（記者）就衝落車影影影，真係好危險！我呢排已經好忙同有好多事要處理，我想講我哋唔係犯法，點解要咁對我哋！前兩日先返香港，難得有假期諗住帶囝囝出去玩吓、食吓嘢，同有空間處理我哋之間嘅問題，佢哋咁樣真係搞到囝囝喊晒同好驚，好影響小朋友，所以喺咁嘅情況下，我真係要出聲！」

薛嘉麟表示發聲是為了保護囝囝，又慶幸香港擁有良好治安：「我唔想囝囝受到驚嚇，好彩佢哋拎出嚟嘅係相機，唔係其他嘢，但我哋最後都要沿途折返屋企，大好假期就咁被影響咗，冇得同囝囝去玩。」

求空間處理感情

問到與Marie現時的感情狀況如何，他則說：「好多事處理緊，畀啲時間同空間我哋，唔想講太多，難得有時間去處理問題，點知突然被人衝出嚟嚇親。」

文：名人組