荷里活型佬韋史密夫（Will Smith）的愛子積登（Jaden）早年與真人騷女星Kylie Jenner傳緋聞傳足幾年最終無疾而終，積登前日拖模特兒新女現身紐約時裝周，睇騷時公然咀唔停做「真人騷」，場外更忘情舌吻，似乎有心晒戀情，向同場的Kylie示威！

年僅17歲的積登言行一向出位，緋聞最矚目莫過於早年密密被拍到跟住Kylie一家出出入入，入晒屋等情花結果，可惜Kylie轉眼撻着男歌手Tyga，公然行街拍拖又拍咬唇片，正當二人日日恩愛見報之際，積登前日拖21歲模特兒Sarah Snyder現身時裝周睇Gypsy Sport騷，公開新戀情之餘，更大模廝樣在頭排攬頭攬頸又咬耳仔，情到濃時更情深咀嘴，姊弟戀熱情如火上演「真人騷」，成為時裝騷焦點！

「舊愛」Kylie懶理

二人出到場外仍未降溫，積登冧到Sarah在街頭又挨又攬之外，更被拍到激情舌吻，積登狼死伸脷冧咀，似乎相當忘形，未知是否向同日睇Vera Wang時裝騷的Kylie示威！

至於「女大十八變」變出膠面厚唇扮家姐Kim Kardashian博上位的Kylie成功「升呢」，不但以Cut-out服飾上陣坐頭排，不用再賣肉搶鏡，更與設計師Vera Wang咀面合照，難怪完全懶理積登示威！

Rita Ora冇眼睇「世仇」

此外，Kylie與同母異父哥哥Rob的歌手舊愛Rita Ora同場，兩女全程未見互動，似足世仇，而一頭金髮的Rita以一身全黑透視裝示人，透出內衣及驕人曲線，風騷成為焦點！另外，有傳Kim老公Kanye West近日要求模特兒簽協議，承諾不會講他與Kim一家的是非，否則會被控索償1,000萬美元（約7,800萬港元），大牌到極！

另一方面，百變天后Lady GaGa大前日真空上陣睇Brandon Maxwell騷，而男歌手Drake前日公然現身撐女友兼網球手S威廉絲（Serena Williams）的時裝騷，更在後台錫錫女友小手，Sweet到暈！

文：外娛組