天后麥當娜明年2月到澳門新濠影滙舉行巡唱，圈中歌手紛紛讚好等捧場！徐濠縈笑稱會叮囑老公陳奕迅（Eason）撲飛，薛芷倫則明言「一生人最少要睇一次」！

薛芷倫：「我曾經喺拉斯維加斯睇過麥當娜嘅演唱會，覺得好正，氣氛好熱鬧！跳舞、唱功同服裝都一流，我覺得一生人最少要睇一次！今次我都搵人訂咗飛，一定要最前，就算貴都物有所值。」

徐濠縈：「我諗淨係睇香港站先。（係咪撲最貴嘅$16,888 VIP飛？）唔知使唔使畀錢買喎！我哋（同老公陳奕迅）好少畀錢買演唱會飛！（聽聞你已經開始撲飛？）老公一定會幫我撲到飛，唔使我去撲飛！」

楊千嬅：「我要睇吓個檔期先，如果有時間都會捧香港嗰站嘅。不過我工作太忙，應該抽唔到時間去香港站以外嘅地方睇騷，如果真係攝到空檔去多幾個地方睇都無妨！」