視后楊怡在無綫新劇《收規華》向難度挑戰，飾演自梳女，周旋於張繼聰及楊明之間，本應心如止水的她，卻為冤家阿聰及由衷傾慕的楊明再起漣漪，最後更不理世間壓力，脫離自梳女行列，獲監製讚演得絲絲入扣。

楊明飾演正直警察，令自梳女楊怡心生傾慕之情。

楊怡宜古宜今，之前在《守業者》中曾演民初寡婦，表現不俗，今次在新劇《收規華》中接受新挑戰，飾演自梳女梁芯，她說：「我係第一次演自梳女角色，梁芯細細個就被師傅收養，所以思想比較傳統，由細到大好少接觸男人，對男人總係保持距離，佢對男女之情嘅表現都好稚嫩，只知道身為自梳女，喺男女之情上絕對唔可以越軌。」

今次編劇偏偏安排由張繼聰飾演亦正亦邪的收規華，以及由楊明飾演的正直警察齊齊出現在楊怡面前，令她本應靜如止水的心境，泛起一陣陣漣漪，楊怡說：「梁芯好睇唔過眼收規華嘅所作所為，尤其係佢收黑錢，又成日走嚟單單打打啲自梳女，所以佢哋兩個係冤家關係。而楊明演嘅正直警察，就同阿聰相反，佢雖然都係警察，但就拒絕同流合污收黑錢，仲想一洗警隊呢種歪風，所以梁芯好欣賞佢，好敬佩佢喺一個貧富咁懸殊嘅黑暗時代，都堅持理想。我、阿聰、楊明加埋林夏薇，四個人喺故事裏面關係好微妙，構成咗一個錯綜複雜嘅四角關係，但係四個人之間都發展出純潔嘅友誼，係個好好睇嘅戲！」

林夏薇做花魁 堪稱代表作

劇中林夏薇與楊怡的角色180度不同，雖然與楊怡屬兒時好友，但因個性不同，引發出截然不同的命運，最終更輾轉流落塘西風月場所，成為石塘咀花魁，監製方駿釗盛讚兩位女演員：「楊怡演嚟敢愛敢恨，感情戲絲絲入扣，非常感人！而林夏薇嘅角色同佢真人性格好唔同，好考演技，但佢表現得非常好，呢次可以話係佢嘅代表作！」