抖了兩日，Fans等到頸都長！第六集《我愛發哥》昨日在《東網巨星》播出，今集神級影帝周潤發接受兩屆視后佘詩曼「挑戰」！阿佘請教發哥如何保持面部緊緻，發哥自爆秘方，原來是被發嫂每日左右開弓兜巴星？當然係講笑啦！

阿佘請教發哥如何保持面部緊緻。

發哥講笑表示被老婆摑到Firm晒。

阿佘表示除要向發哥學習外，在她心目中發哥更是No.1。

阿佘獲發哥稱讚及回覆，當堂笑到見牙唔見眼！

阿佘：我好鍾意演戲，我亦好欣賞識得演戲、同我可以向佢學習嘅人，發哥當然係No.1，佢好大嘅氣場，無論演咩角色都入型入格，好細緻嘅位都做得好好！好難呀！我覺得發哥好勁！

發哥：阿佘，你又客氣喇！我睇你戲睇到大，我細細個就睇你嘅戲！（阿佘：唔係啩？）由你第一套TVB出嚟，到同陳豪演公主，最近個咩姐話？犀利啦！殺晒呀！又攞埋獎，我都要向你學習，估唔到你演喜劇咁好睇，又好笑！我嗰時都不知幾想叫林峯你行開啦，等我做啦！（阿佘：哈哈哈！好呀！）不過，林峯係靚仔嘅，有機會跟你學習！光仔冇話我好仰慕你咩？你個御用化妝師呀！

阿佘：我想知發哥為拍嘢有時要增肥，有時又要減肥，點解塊面仲咁Firm？

發哥：呢個問題好難答你，我一唔聽話，我老婆就兜巴摑埋嚟，摑完左面摑右面，你唔Firm就有鬼啦！你唔好周圍同人講呀！我自己知咋！

興奮獲讚賞 如小學生貼堂

得到發哥稱讚及回覆，阿佘當堂笑到見牙唔見眼，自比心情如小學生獲讚，她說：「多謝發哥讚我，好開心好開心，好似小學生貼堂咁，我都好希望有機會同你合作，發夢都冇諗過，希望有機會向你學習！」