張繼聰拍攝無綫劇《四個女仔三個BAR》後成為陳凱琳等四位女主角的偶像,她們更組成「張繼聰後援會」,又讚她們識得氹「叔叔」。面對太太謝安琪首次擔正拍劇,他絕不意見多多,抱吹噓心態互相欣賞。

張繼聰忙於工作難以陪家人,故十分珍惜每個相處的機會。

張繼聰獲陳凱琳等靚女組「後援會」,氹得「叔叔」甚歡喜!

張繼聰不會對太太謝安琪(右)的演技畀太多意見,免傷和氣。

繼早前在無綫劇集《忠奸人》中的邪惡殺氣以至《老表,你好Hea!》中的剝衫爆肌,張繼聰(Louis)可謂形象百變,而在《四個女仔三個BAR》中雖做一個平實角色,但其魅力沒法擋,更吸引着劇中四位女主角陳凱琳、陳瀅、劉佩玥與何雁詩,組成「張繼聰後援會」成為Louis的小粉絲,他笑說:「佢哋係好識氹叔叔,最緊要係威逼利誘啦!講笑啫!其實係因為拍戲成日對住,做咗好朋友,好慶幸佢哋好畀面我,冇覺得我好脫節、好『阿叔』!」他又笑言從四人身上重拾青春追回潮流:「拍完真係有好多回憶。」

陪囝重質不重量

對演員而言,拍劇工作非常忙碌,經常日夜顛倒以致難以陪伴家人,但Louis認為與家人相處不是用時間長短去衡量,故每逢與兒子共聚都會全程投入:「安全感唔係視乎你放幾多時間,如果個關係健康,即使見唔到都會好信任。」

互相吹噓當交貨

提到太太謝安琪殺入「公仔箱」首次擔正拍劇,Louis指會放更多時間照顧家庭,分擔壓力。問到對太太演戲的意見?他笑說:「從來唔會畀太多意見!因為我哋做法唔同,都係抱住互相吹噓嘅心態相處。講真若果大家個品味上面係唔同,就做唔成夫妻啦!一定係大家睇法上相似,懂得去欣賞對方先會互相吸引喺埋一齊。」