來自澳門的歌手小肥及陳慧敏近年齊齊來港發展，不乏合唱及拍微電影的機會，老友鬼鬼的兩人鏡頭前總是互相奚落及整蠱，猶如火星撞地球，慧敏笑言他們是最惡心的情侶檔，小肥更指與慧敏拍親熱戲是一種折磨，非常搞笑！

陳慧敏與小肥總是愛互相整蠱！

小肥與陳慧敏合作無間。

歌手小肥（徐智勇）及陳慧敏可算相當有緣，同樣來自澳門又性格爽朗，近年不乏合唱及拍微電影的機會，非常老友！兩人一拍埋受訪就擦出火花，不停互窒令人笑爆嘴！

提到早前在微電影中飾演情侶，小肥說：「我哋唔係好夠冧，哄埋啲大家都即嘔，鏡頭前都扮到嘅，好在點到即止冇咩親熱戲咋！」慧敏還擊說：「同佢有少少情深戲已經好惡心！」

笑到撼崩牙

小肥續說：「哈哈！未到親熱已經係折磨！但出嚟效果幾有火花，係互相糟質嗰隻！（你成日蝦慧敏？）唔係呀！佢睇落似細細粒，但唔會坐以待斃，佢反擊好勁o架！」小肥再踢爆慧敏有次笑到忘形撼崩牙的瘀事，令慧敏啼笑皆非！

患難見真情

兩人惺惺相惜，曾有互相扶持的感性時刻，小肥很欣賞慧敏的才華：「當年佢喺澳門參加歌唱比賽，係我做評判，我覺得佢風格好獨特，之後推介畀香港同澳門公司，大家都覺得有得做，始終好少有呢種咁靚女嘅『男人』吖嘛！」慧敏則感激對方提攜，又大讚小肥的演出具「雄風」及有壓台感：「佢係位慈祥大哥哥，我一直好崇拜呢位師兄，做到同事後見到佢溫柔一面，我有咩唔開心、難關都會同佢分享，第一年出道我好驚青，佢以過來人身份開解我，好窩心！」