港姐陳凱琳昨日為無綫劇集《殭》拍攝吊威吔戲，她要被吊起來回飛二十多次，甚考體力。對於緋聞男友鄭嘉穎因病缺席，她說：「好快會冇事！」又稱與嘉穎戀情沒有進展，大家仍是朋友。

穿上古裝的Grace在烈日下飛足二十幾次，都咪話唔辛苦！

飛翔失敗的Grace狠狠跌落地上，但嘉穎唔喺度，惟有自我安慰啦！

Grace和嘉穎在劇中有宿世情緣，唔知現實中又有冇呢？

陳凱琳（Grace）昨日在元朗為無綫劇集《殭》拍攝外景，原本與緋聞男友鄭嘉穎同場開工，但嘉穎卻因身體不適而缺席。Grace在烈日當空下拍攝吊威吔飛天場面，穿上古裝的她被吊起來回飛了二十多次，劇情更講述她飛翔失敗倒地，非常考體力，但她全程笑笑口毫無怨言，還識做地請工作人員飲凍飲消暑。

呻要開工冇進展

Grace表示不是首次拍吊威吔戲：「之前拍《張保仔》試過喺廠拍吊威吔戲拍足九個鐘。（嘉穎病咗？）知佢有少少唔舒服。（有冇慰問吓嘉穎？）大家都好關心佢嘅。（心痛？）好快會冇事。（係咪要避免同場？）唔會，今晚大家都已經要拍廠景。」

提到劇中與嘉穎有宿世情緣，Grace笑說：「現實唔信，但尊重呢個睇法。」提到緋聞，她說：「唔係正式拍拖，依家要開工，所以冇乜進展，大家仲係朋友。」提到好姊妹劉佩玥與黃又南傳撻着，她說：「唔清楚，佢想講自然會講。（《殭》造就唔少戀情？）如果傾得埋開心，多少少發展都唔出奇，佢兩個都好爽，見佢哋都啱傾。」

打情罵俏冧到爆

傍晚Grace返回電視城開廠遇上「男友」鄭嘉穎，兩人接受無綫《東張西望》訪問時打情罵俏，旁若無人。提到在荷蘭開工的情況，嘉穎指Grace沒到超靚花田可謂非常可惜，Grace則大表羨慕，令原本因病缺席外景的嘉穎心花怒放，並大讚Grace表現極佳，更自誇多得他提供影碟學戲，此時Grace即怕醜掩面大叫：「Stop！」