薛凱琪(Fiona)與鄧麗欣(Stephy)昨日出席九月在中環海濱舉行的馬拉松記者會,聯同方力申一同獲委任為大使的她們均表示屆時會一同參與。

Fiona坦言唔會刻意搵個男朋友陪跑,要睇上天安排。

Stephy(左)及Fiona均自爆在街上跑步時容易成為焦點,睇嚟藝人跑步都係去番健身室好啲!

Fiona表示平日很少在街上跑步:「因為收工好多時都好夜,搵唔到人陪我跑,以前試過夜晚自己落街跑,但一個人跑有啲驚,一見到附近有男人就會跑快啲想避開佢哋,但咁樣就好攰,所以寧願跑番跑步機。」問到可會打算找個男朋友陪練跑?她說:「咁又唔係要特登搵個人陪跑,我交畀上天安排。」

而Stephy則表示較喜歡留在健身室練跑:「試過喺街度跑遇到啲踩單車嘅人,佢哋會特登追過嚟睇吓你,雖然我知道佢哋冇惡意,但都係感覺怪怪哋,所以都係跑番室內。」問到為何不與男友方力申一齊練習?她笑說:「佢成日嫌我跑得慢唔同我跑,加上佢鍾意同一班男仔一齊,除晒衫咁跑話順便曬太陽,所以冇預我!」