「吹神」陳奕迅（Eason）近年身形不斷發福，終於被他形容為「三項鐵人」的老婆徐濠縈施以無形壓力令他面對健康，但被追問花逾億買三間商廈，Eason即時落閘：「唔答呢啲啦！」，其後又笑言現時只會注重健康及「點再出多啲汗」！

Eason自認「着白色衫都冇咁橫」，你又點睇呢？

Eason與郭偉亮每星期相約打羽毛球。

Eason獲委任為活動中的「教授」。

陳奕迅聯同郭偉亮（Eric Kwok）及導演麥曦茵昨日出席香港電訊「網上行 x MOOV夢想系」成立大典，並獲委任為活動中的「教授」，不過去年獲英國母校頒予榮譽博士的Eason即抵死更正自己是「博士陳」，引來全場爆笑。

近年Eason在內地密密巡唱狂賺人仔，對於日前有指老婆徐濠縈（阿徐）去年8月以1億元狂掃三個商廈單位，Eason即說：「唔答呢啲啦！（個過程唔重要？）唔提呢啲嘢啦！有冇都唔係咁重要，大家可以繼續討論，但我就希望大家唔係討論我呢樣嘢啦！個世界好大，可以留意其他事。」

運動消脂「冇咁橫」

Eason笑說：「以前我都會睇吓八卦嘢，依家只會睇健康，當你有一個三項鐵人選手瞓喺你隔籬，同你一齊生活就只會注重健康，同埋點再進步出多啲汗，睇我今日着白色衫都冇咁橫。其實我一個星期有2、3日同Eric Kwok打羽毛球，但跑步就唔太有興趣，可能我身太重啦！陪佢踩單車，游水都得浮吓浮吓咁。」

夢想一直唱落去

至於今次活動是讓年輕人實現夢想，已貴為天王的Eason可有夢想未成真？Eason說：「我夢想就係去尋找夢想，好多嘢刻意而有期望去做係未必實現到，所以對我嚟講夢想唔係有個期望去得到一個結果，反而係追求夢想嘅過程唔係要結果，而我就淨係鍾意唱歌，能夠一直唱落去已經係我夢想。到依家我都唔會畀太大責任畀自己，因為地位身份可能高過以前，但唔會畀呢樣嘢限制咗我唱，要識得去玩先得。」