崔碧珈雙面情人

崔碧珈（Anita）曾在外國讀書，看似鬼妹仔性格的她並不開放，戀愛經歷亦未算豐富：「我拍過3次拖，細個拍拖都比較兒戲，直至大學時期嗰次，始終年紀大啲，都好刻骨銘心！」她透露大學時期的伴侶是最後一個結識的男友，惟分手收場，拍拖四年分手特別傷心：「我喺外國讀書嗰陣識佢，我返咗嚟香港之後佢仲喺嗰邊，Keep咗半年之後，可能對方覺得太辛苦所以決定分手。（你都覺辛苦？）其實我覺得遠距離戀愛冇問題！我中途都有返過去兩次。（可惜？）又唔會覺得可惜，呢啲係雙方面，對方都唔覺得可惜就唔可惜，我都幾灑脫！」

擁有健康膚色的Anita感覺開朗，讓人好奇她是個怎樣的女朋友，她自言不是嬌嗲女生：「我唔係成日會嗲聲嗲氣，如果得番兩個人喺屋企嗰陣就可能會小女人番啲！」為何在不同地方會有兩種性格？她說：「條街咁多人會好尷尬！」但她自信滿滿地指過往的男友兩種性格都喜愛，好動的她更會投男友所好：「我會玩佢玩嘅嘢，好似陪佢打波或者做運動，而我哋喺屋企嗰陣佢又會陪我捉棋。」

主動煮兩味

Anita亦深知「要留住男人先要留住對方的胃」的道理，不時為男友下廚：「雖然我煮嘢食唔算好叻，同埋我食嘢比較清淡，唔會焗嘢、炒嘢等等，但有時要氹對方都會整吓！」她的性格令其桃花不斷，問到是否有很多追求者？她甜笑說：「OK啦！」惟她曾在眾多追求者中選中「賤男」：「我最接受唔到一定係Cheating（背叛）！無論任何意識定係肉體上嘅Cheating都唔可以接受！意識上係指佢同個女仔Send Message，可能係喺曖昧期，未到肉體上，而我當時第二個男朋友就係畀我當面揭發。（即場反面？）係呀！我性格係咁，唔會忍囉！」

被動等人追

談及遇到心儀男生會主動出擊還是等對方開口？Anita表示感情方面較被動，不會向心儀對象作出暗示：「雙子座性格好極端，好動嘅另一面係好內向，如果遇到個啱啱開始Dating嘅男仔我會好內向，除非識咗好耐。（唔怕機會流走？）如果有咁多機會會好唔得閒！依家做嘢為先，拍拖等緣分安排，會嚟就嚟。」談到擇偶條件，首重性格的Anita鍾情孝順男，但不太重視外貌：「講真我唔鍾意靚仔，就算身形都係，我以前啲男朋友乜嘢身形高度都有！（姊弟戀？）冇所謂！只要溝通到就得。」

自回港發展後，Anita一直單身，大時大節卻不感寂寞，會多花時間陪家人：「平時都少見佢哋，拍拖仲怕冇時間！」亦不會因年紀漸長而感壓力：「愛情上冇年齡限制，唔會因為覺得到適婚年齡而隨便搵個人結婚，我鍾意小朋友，但如果搵個人結婚只係為咗生BB係好唔負責任，我相信我戀愛同工作都可以係一段好長嘅時間。」

其家人亦未有催促結婚生子，令她可以專注事業：「佢哋都唔係好傳統嗰啲，佢哋覺得我自己可以決定到嘅嘢都會尊重我。（恨抱孫？）暫時未恨住！」自言不算浪漫的她對理想婚禮沒太大幻想，更不主張舉行鋪張的婚禮：「其實我唔擺酒都得，只要同最重要嘅親友一齊食餐飯已經OK！」

拍檔唔過電

演員之間合作時容易日久生情，問到Anita有否對曾合作的拍檔產生好感？她說：「未有，或者可能唔會有！可能拍嗰陣我已經將對方個身份定咗做工作嘅夥伴，所以都冇諗咁多呢啲嘢。」不過她坦言擇偶不會執着對方是否圈中人：「我冇所謂！我唔會因為對方外貌或者做咩行業，最重要嘅係大家性格啱。」

考慮雪卵子

現今科技發達，更有雪卵子的技術，為不想太快生育或有障礙的夫婦帶來希望，就連大美人李嘉欣亦坦言已雪定卵子留待日後生育之用，目前專注工作的Anita對結婚及生小朋友都未有設定限期，談到會否嘗試這先進技術保障自己？她說：「呢個係幾好嘅Idea，但自己仲未係好清楚，等到差唔多年紀會問吓醫生有冇需要，但唔會介意試新嘢。」

後記：The Best Is Yet To Come

訪問期間，看得出崔碧珈非常重視工作，她自言是過分好學的工作狂，更與一般女生不同，自認年紀不輕的她，即使快到適婚年齡亦處變不驚，未有特別幻想或渴望浪漫婚禮，對戀愛比較豁達。她深信戀愛是不限年齡，所以未有過分着急，對她來說，也許暫時跟工作談戀愛會比較愉快。