羅仲謙昨日到尖沙咀出席品牌慶祝活動，提到劇中「舊愛」吳若希公開「蜜照」似要公開戀情，謙仔表示毫不知情，亦不清楚相中人是誰：「如果真嘅話會戥佢好高興！我一陣八吓先，都想知係邊個。（為劇宣傳？）宣傳又好真實又好，兩件都係好事，最緊要大家開心。」

羅仲謙於活動上獲贈「羊怡」公仔，孖住出場。

另外，謙仔自信皮膚Keep得好，但仍需請教女友楊怡，問會否幫手買女性用品？他說：「呢個年代冇咩所謂，最緊要唔好買錯，不過我冇試過。」他又透露5月左右會返無綫拍劇，稍後或隨電影《西遊記之三打白骨精》大隊到新西蘭拍攝。