陳祉妤屠牛Balance

名模陳祉妤（Balia）經常在天橋上展現風采，回顧過去十年多的模特兒工作，Balia的心態亦一直在轉變，她說：「以前好似一隻牛咁做嘢，希望達到客人要求，雖然依家都會希望做到最好，但唔會再做一隻牛，我覺得人去到某個階段，就發現對朋友、家人嘅關心，對自己各方面照顧其實都唔可以忽略。」現在Balia除了繼續認真工作，更學會抽空關心工作以外的人和事。另外，身為模界前輩的她面對新進模特兒輩出，而不少會「撈過界」涉足影壇，又拍寫真，問到Balia怎樣看待這種轉變，她謙虛地說：「我做嘢比較局限，唔係好夠膽衝出自己框框，反而好佩服新一批Model，佢哋可以嘗試多方面發展，所以我會好欣賞佢哋。」Balia雖然謙稱細膽，但願意突破自己，期待公司給予機會。

感情順其自然

除了工作，Balia的感情生活亦經常備受關注，她說：「依家幾好、幾Stable（穩定），學習相處了解當中。」她似乎未有為自己感情着急，相信一切順其自然。

Balia喜歡分享日常生活點滴，又不時上載自己去新地方試菜的照片到社交網站，雖然她識飲識食，但仍謙稱不敢當「享受達人」：「我着重Balance of my life（生活平衡），因為香港係一個壓力比較大嘅地方，我希望自己嘅分享可以為身邊朋友平衡生活，我鍾意分享，但又唔覺得自己好識食。」

傳統女性多煮意

Balia偶爾會親自下廚，除了因為喜歡飲食，亦是對傳統的執着：「我自細跟媽媽學過普通家常小菜，煲湯、蒸魚、炒菜之類，我覺得作為傳統中國女性係應該識煮幾味簡單小菜。」而名模身份並沒有令Balia對飲食變得挑剔，她大方分享自己的Keep fit之道：「識我嘅朋友就知我唔揀擇，我任何嘢都食，但少食多餐，仲有跑步、通淋巴、正常嘅飲食，呢啲都係我嘅Keep fit之道。」

養狗仔好開心

除了喜歡分享飲食，Balia兩隻白色西摩犬的照片也在她微博有更高曝光率，最初養寵物的原因是與朋友閒聊間覺得養寵物很開心，日子漸久，不知不覺與兩隻愛犬相處了七、八年，她們的關係早已昇華至「家人」，Balia坦言無論飲食或養寵物都影響她的性格：「我覺得無論食嘢同養狗仔都令我更開心，養狗仔亦係一種責任，見到佢健康成長自己都滿足，至於分享飲食，當我煮嘢食畀關心嘅人，或者朋友有一兩個鐘食飯，我已經覺得係一件好開心嘅事，有時香港人太忙，如果可以同一班朋友分享，我會特別珍惜呢個時段。」

後記：買餸友偈傾

訪問當日，Balia的好朋友、廚藝專家余健志（Jacky）剛好在場，兩人除說起上一次聚會的情形，更大談「買餸經」，說起哪個菜檔、哪個魚檔比較好時，更眉飛色舞，天橋上的名模氣場消失了，反而多了一份樂天和善的氣質，同樣令人眼前一亮。