曾是港青排球代表的鄧麗欣，雖然忙於拍戲及唱歌，但現年31歲的她依然有氣有力，決意重拾打排球的興趣，自組排球隊參加公開錦標賽圓夢！只見她在球場上使出鬼影變幻球，強勁的扣殺為球隊搶分，成為風頭躉！

Stephy揼釘式扣殺，連環為球隊得分！

曾是港青排球代表的Stephy，有姿勢有實際。

施展驚人彈跳力攔網的Stephy（右），出盡全力阻止對方的強攻。

鄧麗欣（Stephy）中學時期是香港青年排球隊隊員，加入娛樂圈工作後雖已減少打波，但她對排球的熱誠不減，最近更自資組隊「Loey」參加昨日於旺角花墟球場舉行的《第三十五屆全港公開排球錦標賽》女子組丙組資格賽，不施脂粉的她束馬尾、身穿5號紅色球衣加短褲，以隊長身份率領隊員連勝兩戰！現場有超過三、四十隊參賽球隊，穿上球衣的Stephy突然現身令一班粉絲起哄包圍，男教練及助手上前阻擋，她在球場上認真做熱身及與隊友爭取時間練波，開波前一行人更圍在一起傾戰略。

飛撲網邊救波

開波時，Stephy的名氣吸引大批球迷圍觀，擅長打攻擊位置的她最初表現緊張，惟愈戰愈勇手風極順，更使出「鬼影變幻球」開波，令對手無從招架！Stephy連取三分，其強而有力的扣殺亦為球隊攞得兩分，結果在第一局輕鬆勝出！

外表弱質纖纖的Stephy在球場上表現強悍，發揮其強勁彈跳力瞓身攔網，又成功飛撲到網邊救波，手風極順的她精於攻擊位，隊友大多交予她扣殺，打出水準的她雖然索晒氣，但仍不停跟隊員喊加油！當打贏第二局出線，Stephy開心得對記者豎起勝利手勢！

比賽經驗不足

可惜Stephy的球隊在第二場賽事連輸兩局，其實Stephy四局比賽均打得出色，憑猛力扣殺及開波為球隊搶得不少分數，一度扳平，惜最終無緣晉級入初賽，Stephy失落地說：「輸咗經驗，我哋隊波第一次參加公開賽！」為圓排球夢，她半年前成立球隊，由教練招攬隊員：「搞隊波都係有限錢，Loey係我服裝品牌個名，今次都係第一次夾波，希望有朝一日可以打乙組、甲組比賽啦！」