有傳與前夫湯告魯斯（Tom Cruise）過聖誕的女星姬蒂賀姆絲（Katie Holmes），被拍得帶同女兒蘇莉（Suri）於除夕與設計師前往迪士尼遊玩，相信「復合」無望！

雖然曾有傳姬蒂與靚佬湯會一起過聖誕，但最後證實是流言！姬蒂繼與8歲女兒蘇莉於聖誕節探訪洛杉磯一間兒童醫院後，除夕又前往加州阿納海姆的迪士尼樂園遊玩，同行還有時裝設計師、同志好友Zac Posen與其「男友」Christopher Niquet。

母女手拖手心情勁靚

蘇莉當日在面上化上心心妝，身上亦穿着大個心心圖案設計的上衣，戴黑超的姬蒂則穿着黑色背心與牛仔褲示人。兩母女手拖手在樂園四處走，玩各種機動遊戲，不時露出笑容，心情不錯。

另一邊廂，早前於英國倫敦拍攝《職業特工隊5》（暫譯）（Mission：Impossible 5）的靚佬湯，趁聖誕新年假期前往加勒比海開曼群島，與一班遊客一起學潛水，令他們又驚又喜。據知向來不喜歡用替身的靚佬湯，為了能親身拍攝水底戲份，故專誠往學潛水，知情者說：「靚佬湯好有天分，嗰個教練明顯係佢嘅粉絲，一直戴住由佢主演嘅《壯志凌雲》（Top Gun）鴨舌帽。個教練同學員講解嗰陣又用靚佬湯個姓玩食字笑話，教大家應該用咩速度下潛，搞到靚佬湯都忍唔住笑出嚟。」