31歲的女星李彩華（Rain）外表省鏡又身家豐厚，卻至今仍未找到可靠的另一半，她接受《好報》專訪時自爆成為教徒後堅持婚前No Sex，因而嚇走至少半打急色男！曾有追求者以三卡鑽戒氹她破戒，惟Rain依然不為所動！

不乏裙下之臣的李彩華絕不為任何男士破戒，正靜待真命天子來臨。

揼本保靚樣的李彩華視荷里活女星安祖蓮娜祖莉為性感女神！

李彩華於新一期《好報》剖白內心世界！

單身小富婆李彩華入行多年一直Keep住索爆身材，年屆31歲的她更增添一份成熟韻味，難怪令追求者把持不住！不過，Rain接受《好報》專訪時自爆兩年前受洗成為基督徒，自此堅守教條拒絕婚前性行為，期間至少半打急色男難抵慾念，追求最多三個月便打退堂鼓！

堅拒男女共處一室

Rain昨日表示會繼續「守貞」直至遇上真命天子，即使型男或富二代亦冇價講，她大爆曾有追求者利誘破戒，當中一名「有米男」趁Rain生日出動三卡鑽戒暗示想與Rain「進一步發展」，最終卻慘食檸檬：「個男仔各樣條件都幾好，佢覺得送隻戒指就代表有誠意，叫我放心，但唔係有隻戒指就可以咁，戒指我自己都買到！最失望係我拒絕佢之後，佢竟然收番隻戒指，仲人間蒸發，大家冇再聯絡，我覺得兩個人真心相愛唔一定要發生性行為！」問到可有追求者「霸王硬上弓」？她指不會與異性孤男寡女共處一室，以免蝕底：「啲男仔食完飯後都會邀請我上佢屋企，話聽吓歌飲吓嘢，我唔知係咪一定有事發生，但費事引人犯罪，同畀自己考驗啦！」

性感OK 色情No Way

樣靚身材正的Rain自爆保養妙法是每日飲母親炮製的花膠鮑魚靚湯，問到身材Fit爆可有信心作突破性的裸露演出？她說：「我唔介意性感，主要睇劇情，但始終覺得外國有呢啲戲好正常，嚟到中國人社會好易變咗色情，唔係靚嘅畫面。」又指視荷里活女星史嘉娜祖漢遜、安祖蓮娜祖莉及安妮希芙威為性感女神，大讚她們舉手投足都相當性感！