2008年亞姐亞軍顏子菲近日回復自由身，渴望跨足影、視、模界多線發展的她，首要任務是增加曝光率一脫「亞視味」！子菲在亞視浸足六年終於畢業，雖然在演戲方面零經驗，但她無悔入亞視，更自嘲「亞視冇人睇」，可當新人再出道，更笑稱以「千頌伊」為目標，成為「國民女神」！

唔講唔知，原來子菲已經回復自由身，同亞視講Bye Bye！

子菲身材索爆，不時在人前騷Quali，但私底下個性十分男仔頭！

亞姐出身的子菲做過不少主持工作，但演戲經驗就有待累積喇！

子菲曾在2008年參選亞姐，成為亞軍。

子菲認為人紅與否乃天注定，唔通真係唔羨慕Angelababy紅透中港兩地？

子菲曾與劉子葱主持亞視節目。

全智賢演「千頌伊」演到街知巷聞，要學佢有啲難度噃！

秋生咁有台型，淨係個氣勢都嚇到子菲腳軟。

顏子菲早前約滿亞視，決心搣甩「亞視味」向外闖，誓要重新做全方位藝人，更笑言以韓劇《來自星星的你》中全智賢飾演的「千頌伊」為目標，盼望有日能成為「國民女神」！恢復自由身後，她坦言工作毫無局限，既可行天橋又有電影試鏡，更獲不同公司招手！子菲的夢想是當High Fashion超模，亦渴望踏足影視界發展，不過，在亞視浸足六年的她始終未能輕易「洗底」，有次與李綺雯接受無綫訪問，但片段最終未能播出，幸而雄心壯志的她沒有被打沉：「大家可能覺得我亞視味重，希望快啲喺唔同場合曝光，等大家印象加深啲，知道我係自由身、好Free，唔再係亞姐或亞視藝員。（想加入無綫？）無綫暫時未有招手，有機會合作嘅話我一定願意。」

演戲由「零」開始

雖然子菲擔心要花很多時間「洗底」，但仍飲水思源未有後悔加入亞視：「依家當自己係全新嘅人，當然好多謝舊公司栽培，冇佢哋唔會有今日嘅子菲，以後嘅路更長，希望飛得更遠更高。」談到同期出道的藝人成績不錯，但亞視遲遲未有新劇推出，會否覺得在亞視浪費時間？子菲則認為人紅與否皆由天定：「即使我2008年入無綫，都可能未必即刻紅，要捱幾年，所以每個人運數唔同，好似Angelababy細細個就紅透半邊天，呢啲真係好好彩！我相信呢一兩年自己會有好大轉變。」一直擔任節目主持及大型活動司儀的她，除了在亞視上過培訓班外，演戲經驗可謂近乎零，但樂觀的她笑說：「之前就當自己讀五年醫科，依家畢業走入社會搵工囉！以前喺舊公司都好畀心機學嘢，喺亞視都有好處嘅，橫掂大家話冇睇我哋電視台，咪當新人再出道囉！」

試鏡「武」傷筋

在加拿大留學時曾參演話劇的子菲十分享受演戲的感覺，故希望與影帝黃秋生合作，趁機偷師學演技。談到早前為動作片試鏡，她跟武術指導學了二十分鐘基本動作便不慎拉傷大髀和頸，子菲坦言有點嚇怕：「因為我冇功夫武術底子，唔小心就會好易整親。成龍、甄子丹咁資深都周身傷，更何況係我呢啲從來未接觸過嘅！但我都會想嘗試，發掘潛力。我演技方面差啲，因為經驗唔夠，睇吓自己適合邊種路線，以前專注做司儀，其他未接觸過，希望可以擴闊視野。」

後記：偷師黃秋生 嚇到腳軟

平日出席公開活動，子菲均以性感低胸裝示人，鏡頭前也保持淑女形象，但鏡頭後卻是個不折不扣的男仔頭，性格既爽朗又搞笑，十足傻大姐一樣。深深中了「韓毒」的子菲，每次講到K-Pop和韓國綜藝節目都異常興奮講不停，難怪會以「千頌伊」為目標！談到想跟哪位藝人合作時，子菲打趣稱「靚仔就得」，自言喜歡混血男生的她，更大讚黃秋生又高又型，並自爆曾訪問對方：「嗰次都嚇到腳軟，講嘢愈嚟愈細聲！」