余文樂一向鍾情跑車及四驅車，最近卻轉口味玩古董車！日前他與好友沈嘉偉到柴灣睇車，未幾揸着出廠24年的古董波子在附近兜足15分鐘，接着殺入新界繼續揀新「玩具」！

坐擁多部靚車的樂仔現身柴灣揀「玩具」，似乎想買聖誕禮物喎！

愛車如命的樂仔升呢試揸古董波子。

樂仔（右）與沈嘉偉等位食魚蛋粉時傾到興高采烈。

電影一部接一部的余文樂，年前與愛車之人郭富城、張智霖及沈嘉偉等成為好友後，開始對車有要求，過往揸開數十萬元座駕的他，近年逐漸升呢，現時擁有多部名貴跑車及四驅車，價值由百多萬元至八百萬元不等。

平吔魚蛋粉

日前下午3時許，樂仔駕駛落地四個月、價值約250萬元的平治G63四驅車離開寓所前往柴灣工業邨，將座駕停泊在後巷的他進入附近一間汽車陳列室，由老外開門迎接，他與對方握手後便入內會合早已到埗的沈嘉偉。

未幾樂仔便揸着一架出廠24年的古董保時捷跑車駛出，當時車上有一名男子相伴，試車約15分鐘後便折返。古董波子以公司名義登記，該公司其中一名董事為歌手麥浚龍哥哥麥俊翹（大寶）。

其後樂仔與沈嘉偉各自開車前往筲箕灣東大街食平民魚蛋粉，由於當時店內爆滿，於是他們在門外邊等位邊吹水，試完車的樂仔似乎對古董波子大感興趣，更講到眉飛色舞，動作多多的他神情興奮！而沈嘉偉的弟弟沈健偉其後前來會合兩人。

買樓最實際

醫肚後，意猶未盡的樂仔與沈氏兩兄弟前往沙田一間車行睇車。昨日記者就試車一事致電樂仔，他說：「其實我係去學吓嘢，見識吓，冇乜特別！」問到是否有意再買車？樂仔說：「買都買樓好啲！」