杏兒收神秘玫瑰 Mr.R疑似吳卓羲
前年與舊愛黃宗澤結束八年情的「盛女」胡杏兒，雖然不乏裙下之臣，可惜至今仍然冇着落！然而，昨晨從機場出發到新加坡的杏兒，上機前卻收到神秘人Mr.R送上驚喜玫瑰花，一臉驚訝的她大膽猜測與她合作過的吳卓羲是「R先生」！
杏兒拿着Mr.R送的花，一頭霧水，係咁笑！
花束的卡上署名「Mr.R」，更添神秘！
突然有工作人員送上花束，被嚇呆的杏兒急急睇吓係邊個送！
黃宗澤（中）在內地拍劇時抽空到附近探陳展鵬等。
現年35歲的胡杏兒與黃宗澤甩拖兩年多，雖然身邊追求者一籮籮，期間又傳過與內地影星于波及台灣男星黃少祺撻着，惟統統都是「冇米粥」！Dry足兩年多的杏兒上月更漏口風，自爆有意參加Speed Dating搵男友，可見她亦心急脫離「盛女」行列！正當大家以為杏兒要Dry爆過聖誕之際，昨晨她在機場收到神秘男Mr.R送上的玫瑰花，同劇拍檔吳卓羲（Ron）即成為頭號嫌疑人物！
盡力發展戀情
杏兒昨晨偕黃浩然現身香港機場，準備出發到新加坡，出席當地的粉絲聚會，同時為無綫劇集《醋娘子》及《名門暗戰》宣傳。杏兒抵達機場後，突然有工作人員送上署名「Mr.R」的玫瑰花，上面更寫有「醋娘子 胡杏兒 收視爆燈！揚威國際！Mr.R」的祝福字句，大感錯愕的杏兒更當場嚇呆！
由於洋名Ron的吳卓羲與她合作《醋娘子》，故杏兒起初估計玫瑰是Ron所送：「好奇怪呀！但佢邊會有咁好呀！又或者可能係啲好姊妹送，當玩吓！」雖然對神秘男毫無頭緒，但她矢口否認蜜運中：「冇冇冇，冇啲咁嘅事。」她表示若玫瑰花由追求者所送會感動，惟「嫌棄」花上的祝福字句：「都感動嘅，但係冇呢張嘢會好啲。」其後她自爆最近認識了不少朋友，但因忙於出席聖誕商演而無暇談情。提到何時發展戀情時，她笑說：「盡力啦！因為多狗仔隊跟呀最近。」更笑言記者將其「朋友」嚇走！
Ron認送過花
而有嫌疑的吳卓羲正身在內地拍劇，當他得知杏兒收花後，即笑說：「乜佢咁話我？話晒以前我喺意大利拍《衝上雲霄》都有送過花畀佢，雖然唔係得佢一個有，化妝同服裝阿姐都有，但唔知點解佢咁話我。」而《醋娘子》監製潘嘉德對於「Mr.R」送花則表示不知情：「我都唔知，我都係睇《東網》即時新聞先知有人送花畀佢。」問到「Mr.R」是否吳卓羲？他笑說：「唔知呀！Ron都唔喺香港，但我相信個『R』係指『Mr.Right』。」
至於，杏兒舊愛黃宗澤目前在內地拍內地劇《偏偏喜歡你》，但亦不忘到附近探無綫劇《張保仔》的演員包括陳展鵬、陳志健等。對於「Mr.R」，黃宗澤透過經理人說：「依家我喺內地拍劇，好忙，兼顧唔到送花呢樣嘢！依家我仲單身，更要專注工作，拍拖暫時冇諗，工作為先！」而曾與杏兒傳緋聞的李思捷則笑言想知Mr.R的真面目：「哦！Mr. Right吖嘛！即係最適合佢嗰個囉！但我唔知係邊個，希望佢快啲搵到！如果真係，就要出嚟慶祝吓，我都想知邊個係Mr. Right。」
