陳凱琳把世界寄回家

陳凱琳由中學開始養成儲明信片的習慣，每到一個地方都會寄給自己和朋友，在這講求速度的網絡時代，她偏偏喜歡慢活的Old School調子，加上願意花時間執筆寫字，令這些小卡片記錄的情懷更加珍貴！　

凱琳喜歡寫作，認為一筆一畫寫下的文字分外有情。

陳凱琳

凱琳家中收藏了歷年旅遊寄回來的明信片。

雀躍
凱琳翻看一堆寶貝明信片，憶起當時的心情。

鬱悶

陶醉

應屆香港小姐冠軍陳凱琳由中學時期開始，便有儲世界各地明信片的嗜好，每次跟隨父母到世界各地旅行，都會在當地購買一張明信片，久之成習。她更會隨心寫上當時的心情、感受和所見所聞，透過郵遞寄回家，她說：「細個好少買嘢，有次同父母去旅行就諗，有啲乜嘢可以畀自己留念？不如買張明信片寫啲嘢寄番畀自己，可以留個紀念，去過嘅地方都會深刻啲！」

感染朋友感動自己

凱琳儲明信片的執着，漸漸變成與家人和朋友間一種聯繫感情的方法，自已購買的、家人送的、朋友寄給她的……現時已收藏約八十張，蘊含的是電子訊息無法盛載的情誼，她說：「去到每一個地方，除咗會寄張明信片畀自己，仲會寄畀朋友，上年去土耳其宣傳香港，都有寄明信片畀朋友講吓當地情況同我嘅感受，久而久之，朋友去旅行都會寄明信片畀我，最深刻嘅一張係有個女性朋友第一次去旅行，佢喺愛爾蘭寫咗張明信片畀我，話好掛住我，又講當地係點樣，睇到都好感動，好似自己都去咗嗰個地方咁！呢啲情懷係E-mail、WhatsApp唔會有嘅！」

慢活態度偏偏喜歡

大學時期修讀傳理系的凱琳喜歡寫作，面對一味求快的網絡時代，她更喜歡「慢」的珍貴：「打字太快，自己反而鍾意寫字，寫字可以加深記憶，尤其去過嘅地方，用筆寫低印象就會好深，同埋花時間親筆寫特別有份感情！屋企有幅牆貼滿晒明信片，得閒睇吓，回憶去過嘅地方都好開心。」參選香港小姐的時候，凱琳曾到法國拍外景，順道探望朋友，回港不久便收到一張由法國寄來的明信片，令她十分感動：「當時參選緊，其實心情係好緊張！返到嚟香港收到朋友嘅明信片，上面寫上打氣支持嘅字句，當時真係好開心同感動，信心都增加，特別係你知道朋友為你花時間而寫，呢份情，同講求快、即興嘅WhatsApp 唔同！」

在逾八十張明信片的收藏中，凱琳最喜歡由希臘寄來的一張，上面是希臘聞名於世的白屋及令人嚮往的陽光，她說：「每次睇見張明信片就好想去希臘，希臘係下一個最想去旅行嘅地方。」