衛詩等待黎明

衞詩與關楚耀當年拍拖去東京搞出「大頭佛」，藏毒事件令兩人賠上大好前程，Jill更被老闆黎明終止合約，歌手之路即時畫上句號。這次沉痛教訓，令她在娛樂圈近乎消失，慶幸Jill在錯誤中成長，近年她愛上運動又注意飲食，與六年前的Jill可說判若兩人，六月初她更在本地饒舌歌手Doughboy的新歌《Ally》中Featuring演出，令人再聽到她的歌聲。Jill感激地說：「好開心佢畀咗個機會我唱呢首歌，佢仲幫我做咗幾首英文歌，依家搵緊人寫中文詞，睇吓有冇機會出到碟啦！」

再續「歌手夢」

講到出唱片再續「歌手夢」，早前盛傳華納邀衞蘭（Janice）約滿Amusic後過檔，但Janice開出的其中一個條件是要華納簽埋妹妹Jill？Jill說：「我有聽聞過，我都好掛住同家姐一齊做嘢嘅日子，佢任何決定我都會支持。（帶唔到你入去都冇所謂？）如果間公司對我根本冇信心，我都唔會逼自己簽，我寧願有一間公司係對我有信心先，而唔係因任何人嘅關係，家姐都知道我諗法係點。」

當然經歷過失去，Jill學會努力裝備，她終於在下月再登舞台：「係一個非洲音樂劇《Telema》，第一次喺香港公演，能夠做到呢套劇嘅女主角當然好開心，除咗唱歌要兼顧做戲，所以都好緊張，日日都練氣練聲為演出做足準備。」由於是個非洲音樂劇，可能不是太多香港人認識，但Jill則不介意付出的努力有多少人知道：「就算做咗冇人知都唔緊要，因為對我嚟講，呢次演出係一次好好嘅經驗。」通往音樂劇的路打開了，但最令Jill意外的是「電影之門」亦為她而開，參與《臥虎藏龍》的Casting令她非常難忘。

祝福前老闆

Jill經過六年時間，演藝事業才稍露曙光，回憶六年前「大錯」，被當時Amusic老闆黎明終止歌手合約，等如把她「逐出」娛樂圈，有些人會覺得黎明對Jill太絕情，她卻沒有抱怨黎明的決定：「或者係我令到佢失望，但係好唔開心，我好錫Leon到依家都係，好掛住佢，我都留意到佢啲新聞，我都想佢開心，想佢好。（知道Leon離咗婚？）係呀，好慘。」六年來可有與Leon見面？Jill眼紅紅說：「自從嗰次日本返嚟後一次都冇見過佢！（好想見到Leon？）我好想。（佢避見你？）或者啦，好似唔想見我，但唔緊要我明白嘅。」

當年是黎明一手發掘Jill，讓她出唱片做歌手，Jill對黎明沒有恨意，心裏只有歉疚：「Leon真係幫咗我好多，佢放咗好多錢投資喺我身上，又鼓勵我啦，好多嘢都係我錯，唔關老闆事。（體諒Leon當日對你嘅決定？）係，冇辦法，亦唔會覺得係冇理我感受，我冇嬲到佢，但唔開心一定有。」

看透得失

終於有新開始，Jill希望給Leon和歌迷看到，她跌倒後一直努力站起來，亦學會看通得失，當日失去的一切，不代表是壞事：「原來好多發生咗嘅事，表面睇好似好差，原來下面係一個祝福嚟！如果當日喺日本冇事發生過，相信依家嘅我一定唔會好得去邊，會繼續沉淪落去，反而出咗事，先令我將一啲唔好嘅習慣Cut晒。」

後記：尋獲最愛

Jill的最大收穫是認識到拍拖4年的中英混血兒男朋友Tim，他清楚Jill過去的事，Jill亦沒想過隱瞞：「返教會識到佢，佢成日講神喺我生命入面。」Tim於美國讀電影畢業，美其名是對香港電影圈幕後有興趣，決定留港發展，實質是捨不得掉下Jill，要留在女友身邊一齊為事業打拚。