音樂人郭偉亮及葉佩雯前晚「夫妻檔」為節目擔任嘉賓評判，期間因倒瀉汽水弄濕褲而被取笑「濕晒」的郭偉亮坦言好High！

Eric大爆老婆葉佩雯善於在奶奶面前「扮晒嘢」。

祖藍與亞男情侶檔為節目宣傳，大耍花槍。

玩到「濕晒」的Eric要走入後台整理。

郭偉亮（Eric）、葉佩雯（Grace）及彭家麗等前晚錄影無綫節目《Sunday扮嘢王》，擔任評判的Eric於節目中被王俊棠等人扮演的樂隊Village People逗笑，結果打翻身旁的汽水弄濕褲，Eric更狼狽地走入後台整理，其後被主持王祖藍取笑「濕晒」，不過Eric未有介懷，更坦言好High。曾於廣告扮演Iron Man的他，笑指現實生活中，老婆最善於在奶奶面前「扮晒嘢」，Grace聞言即說：「嘩！好驚，出晒汗，玩咁大！（忍辱負重？）我平時好多嘢講，但同奶奶就會靜啲同講嘢小心啲，我哋關係OK！」

亞男開綠燈畀祖藍

此外，祖藍昨日與女友李亞男為該節目造勢，對於在劇集喪咀令男友祖藍詐型，亞男笑指祖藍內心的確有一絲醋意：「最多畀佢拍番兩部類似嘅打和。（角色網上多人討論，有信心贏飛躍獎？）有提名已經開心，依家當拎咗！」至於被問到是否真有醋意？祖藍說：「冇醋就驚啦！叫佢隨便咀，呢啲嘢係鬥拎Quota啫！」