王敏奕曖昧糾結

新星王敏奕（Venus）憑無綫電視劇《女人俱樂部》（《M Club》）中「嫩版李麗珍」一角而人氣爆升，頻頻出席活動吸金之餘，更於電影《曖昧不明關係研究學會》中擔正做女主角。愛情方面，Venus與曾志偉兒子曾國祥愛得甜蜜，可謂事業愛情兩得意。年僅22歲的Venus樣子甜美，旁人難免猜想她是憑美貌、靠關係而獲演出機會。然而，會有這種想法的人，大概不知道Venus亦經歷過辛酸時候，星光背後的她曾付出日以繼夜的努力。

學生演員兼顧

簽約經理人導演麥曦茵旗下前，Venus曾經歷等工開的時期，更因仍然在學，而令其演員的專業不被認同，她以「曖昧」形容這階段：「兩年前仲讀緊書嗰陣，拍咗一套新加坡電影《Camera》做女主角，一日拍十幾個鐘戲，返八個鐘學，根本冇時間瞓覺。但係原來人哋始終覺得你係Part-time，個演員身份好曖昧，原來一樣嘢你要係專業你要Full-time咁做，咁我就走咗去New York學戲。」紐約之行除令Venus見識到外國演員的專業外，更令她勇氣大增，於是她在手指罅紋上「No Fear」提醒自己。

14歲入行做模特兒的Venus，能夠從眾多女模中脫穎而出，皆因她擁有勇往直前的決心。Venus坦言不喜歡停滯不前的感覺：「嗰種不明朗，其實我自己係幾驚嘅！不過人生好難避免有曖昧嘅感覺，我會逼自己行出呢個曖昧、呢種不明朗，有一個目標我會努力向前囉！」她自言與在電影中飾演的李寧性格相似：「佢係好堅強、好堅定嘅女仔，呢樣嘢我覺得幾似。佢想做廣告，但係未上到去一個位係可以決定創作一啲嘢，所以佢就決定去讀書喇！好似我咁！」

感情順其自然

事業上曾極力擺脫曖昧，不過感情方面，與男友曾國祥愛得甜蜜的Venus強調未曾經歷過曖昧時期：「又好似冇乜喎，都好順其自然囉！大家都係好負責任嘅人，好快咁處理。」果斷的她自言處理感情不會像電影中角色般拖泥帶水：「其實林逸民（梁曉豐飾）中學話要去外國讀書，畀着係我嘅話會一早傾好咗一齊定唔一齊囉！又唔係行前，又唔係退後，我唔鍾意咁樣囉！」

於《M Club》中與崔建邦咀嘴，Venus笑言於新戲中沒有接吻鏡頭：「未去到嗰個位就唔使特登咀嘅，有時有啲位要咀嘅就咀囉！」問到是否因男友介意而避免，Venus則強調彼此工作不會影響對方。

大玩四角關係

王敏奕於經理人麥曦茵執導的新片《曖昧不明關係研究學會》中，周旋於組合PlayTime成員梁曉豐（Anjo）與黃溢濠（濠B）之間。她說：「一個曖昧咗成八年，一個鍾意佢鍾意到出晒面，但係都係一齊唔到，究竟差啲咩呢？咁就要研究吓喇！」不過，原來Venus於戲中更有高富帥正印男友，她笑說：「導演都好錫我！」

感情以外，Venus的角色連工作上都處於曖昧狀態：「生活都幾逼佢，令佢要放棄想做嘅嘢，但係到佢真係做咗廣告，又未必係嗰回事！」

後記：No Fear紋身之謎

第二次見面才發現，形象清純的Venus，原來左手無名指上有紋身，更曾因而被誤以為是與曾國祥的「愛之紋身」。其實紋身上的英文字是「No Fear」（不要畏懼），而非「Love」，是她在紐約學演戲的決心印記，與曾國祥無關。Venus指紋上「No Fear」是用來提醒自己不要畏懼：「嗰時去New York，對我嚟講係踏出Comfort Zone，希望自己唔好咁驚。」除了氣質滿瀉的亮麗外形、麥曦茵和曾國祥的支持、連鄉音都可扮出的演技外，推動她走得更遠的，還有她那勇者無懼的強大內心。