Kellyjackie唔爭戲 對住秋生喊

近年香港樂壇有不少唱作歌手或組合冒起，當中有一部分是憑上載作品到網絡而成為網絡紅人，繼而獲唱片公司發掘進軍樂壇。講到始祖，不得不提於2004年憑《他約我去迪士尼》而彈出的歌手Kellyjackie。現年27歲的Kellyjackie原名陳曉琪（Jackie），早在初中時已經在網上上載翻唱作品，更與志同道合的音樂人組成樂隊Royals，主要翻唱偶像陳慧琳（Kelly）的經典金曲，因而「起朵」為Kellyjackie。《他》推出後，令KJ打出名堂，於2005年獲唱片公司賞識推出唱片。

坐「跳樓機」患抑鬱症

原以為順利登上「夢想號」可以向歌手夢進發，可惜天意弄人，出碟後即捲入合約糾紛，甚至鬧上法庭，當KJ驚覺的時候，先發現自己原來坐上了「跳樓機」，眨吓眼事業已經直插谷底，那種「離心力」，KJ至今仍歷歷在目。「入行至今，的確遇過唔少挫折，而合約問題真係我入行後第一個低潮，當時得嗰十幾歲，廿歲都冇，就要面對呢樣嘢，仲要搞到患上抑鬱症，但呢件事令我重新思考自己嘅未來，令我有能量去讀番書，考番個學位。」

早年KJ完成學業後再戰樂壇，明年將是入行十周年，回望過往歲月，KJ會如何總結？她沒有直接回答，反用例子道出：「我覺得自己一直好似喺河流上面漂來漂去，我唔知將會遇到啲咩，唔知人生會點，人嘅際遇係不可預計，所以有時我選擇唔去諗我究竟要點，我只係知呢一刻我遇到困難，我一定要堅強面對，如果生命注定你要學習一樣嘢，愈早學愈好，當時我覺得官司係好大件事，但事過境遷，咪當係寶貴嘅一課。」

搵雙眼皮男結婚生B

劫後重生，KJ更珍惜身邊的一切，近年除了唱歌外，還踏足演藝圈，跟黃秋生及甄詠培老師學戲，眾所周知，他們均為「好戲」之人，難怪KJ都話上堂令她大開眼界！當中提到同秋生的相處，她自爆曾在影帝前喊到收唔到聲：「有次上堂，咁啱當日我心情差，勁重負能量，出嚟做戲嘅時候做極都做唔到佢嘅要求，我企咗喺度喊，我喊唔係因為畀人鬧，而係好忟自己點解咁。當人哋畀紙巾我嘅時候，秋生哥喝令唔好，話要我記住呢一刻嘅感覺，叫我諗清楚再演多次。」雖然被秋生哥「喝一喝」，但KJ沒有因此而傷心，反而有所得着，令她更愛演戲。

當年因偶像Kelly而改名做Kellyjackie，更有幸跟天后合唱《他》，如今KJ的偶像已經是兩子之母，那麼KJ計劃何時結婚生仔，找一個終身伴侶上演一場「他約我去上教堂」呢？她笑說：「我相信下一個十年內就可以組織家庭抱住BB，其實我好想同一個雙眼皮嘅男仔一齊，因為我相信我哋都係雙眼皮嘅話，生出嚟嘅BB都會有一對好靚嘅雙眼皮，哈哈！係咪好低能？」

後記：陪住新人大老懷安慰！

雖然KJ還是廿多歲的女仔，但論年資已有九年之多，作為「師姐」，KJ都忍唔住講笑說：「呢段時間睇住好多新人入行，好多見到我都話：『我細細個就聽你隻歌o架喇！』有啲甚至話小學已經開始聽，我都好開心，原來我陪伴過咁多人開心嘅回憶，講笑咁講，真係老懷安慰！」