女為悅己者容！愛美是女人天性，前港姐兼節目主持林慧倩亦不例外，天生顎骨較大的她，為保持最佳狀態出鏡，都雀躍一試最新的「V面Facial」，思想開放的她更不介意做整容手術。

工作再忙，Giselle都勤於護膚Keep Fit，可見她深明「世上冇醜女人，只有懶女人」的至理名言！

貪靚的Giselle為保美態可謂無所不用其極，難怪咩角度影都咁上鏡！

誓與「包包面」劃清界線的Giselle，勇於嘗試最新的「V面Facial」。

「V面」五部曲
Step1：先準備好療程所需用品，包括精華素及緊緻精華。

Step2：Facial開始時先要為Giselle落妝，徹底清潔臉上化妝品。

Step3：準備機器將精華素導入皮膚，進行水鑽深層清潔，讓皮膚可充分吸收。

Step4：專業技師會用人手替Giselle按摩面部及通淋巴，讓面部肌肉放鬆。

Step5：完成前期準備工夫後，便進入整個Facial的重點：緊緻精華出場！技師會將匈牙利有機精華搽滿Giselle面上，其後休息起碼三十分鐘，讓精華可慢慢吸收，最後再清潔一次便大功告成。

試完「V面Facial」的Giselle興奮大談用後感，似乎好Enjoy喎！

林慧倩（Giselle）跟所有女士一樣，喜愛打扮及追求完美身形，由於要在幕前演出，故她透露平日「幫襯」最多的必定是美容院：「因為成日都要化妝，化得多對皮膚唔好，成日都要去美容院做深層清潔同護膚，效果比起自己喺屋企做會好好多，否則你上其他妝都唔會吸收。」

重手掃陰影

時下流行瘦面，不少機構及美容院均大賣「V面」療程廣告，對一眾擁有「包包面」的女生而言，簡直是天大的喜訊！Giselle亦是「得益者」之一：「我本身有個問題，就係顎骨比較大，好多時上鏡睇塊面會好闊，平時做嘢影相要就角度都靠化妝，盡量掃多啲陰影，睇落去靚啲、V啲！」

對於坊間的「V面」療程，原來Giselle都頗有研究：「我知道有做手術『削骨』，坦白講我真係唔敢試，另一種『拍骨』反而試過，屬於一種醫療保健嘢，其實我下巴兩邊比例唔均勻，做咗真係可以令面部輪廓平衡番。」她又解釋「拍骨」的過程：「首先技師要鬆弛你面部肌肉，然後用一個類似按壓嘅方法去做、推你嘅顎骨，每次做完感覺牙骹好緊，但唔係一次見效，要持續去做。」

粗髀「致命傷」

近年整容風氣大盛，Giselle認為今時今日的社會接受程度很高。問到若整容對象是自己？她說：「自己要整嘅話，如果要做開刀手術要諗吓，但其他微整容好似打針咁，我都OK接受到，只係需要一啲專業意見，睇睇自己有咩地方要改善先。」她坦言曾接受一些「微針」的美容療程：「其實類似瘦面咁，用針刺激你毛孔，等佢哋活躍番，加速新陳代謝！」

至於身形方面，Giselle表示大致滿意：「只係覺得大髀比較粗同有水腫，可能因為以前參加田徑隊，成日要跑步嘅關係，所以肌肉好結實，依家已經唔敢操得太勁，始終好難減，如果可以減埋佢就完美啦！」近日忙於主持工作的她，早前與賈曉晨及莊思敏等完成一個將在網上播放的愛情故事真人騷：「我哋一班藝人喺節目入面傾咗好多愛情問題，暑假就會推出。」

兩個鐘見效

當Giselle得知有美容院推出「V面Facial」療程時，她立即一試！完成兩小時的Facial後，Giselle說：「感覺面部肌肉有少少提升，下巴範圍都緊緻咗，我估如果Keep住做效果會好好多，而且全人手做感覺好似做緊按摩咁，促進到面上淋巴同血液循環！」