近年圈中掀起一股健身熱，不論男女紛紛施展「GYM」星術，希望操出「人魚線」與「馬甲線」。王梓軒早前拍攝新歌MV騷苦練成果，自言不用去健身室也可以操到爆肌。

王梓軒到公園操肌，引體上升、倒立都難佢唔到。

韆鞦除咗打之餘，王梓軒話一樣咁練腹肌。

王梓軒操到熱辣辣，索性剝埋衫，露出雄厚背肌！

王梓軒喺石椅跳上跳落，腳瓜如此練成。

歌手王梓軒（Jonathan）平時密密實實，但原來是爆肌一族！不過藝人工作多，但Jonathan仍能在忙碌生活中抽空做Gym，原來他自有一套便利健身法：「我嘅健身心得係唔一定去健身室，教練教識我要靈活變通，例如我練隻腳，唔一定要搵部機去練，搵啲有重量嘅嘢去練都得，喺屋企都做到！有時收工收得夜，唔夠時間就會喺屋企做。」除了健身室及屋企外，樓下公園甚至遊樂場均是他鍛煉的好地方。

剝衫拍MV晒成果

日前，Jonathan拍攝新歌《Run》MV，應導演要求脫掉上衣騷苦練成果：「首歌係講挑戰自己，導演話不如Show少少肌肉，呢樣嘢我少做，一來怕醜，二來冇乜需要唔會特別除衫。」他透露一星期訓練六日，無論工作如何忙，仍會抽空做運動。

另外，近日忙於拍攝無綫新劇《華麗轉身》的Jonathan，劇中飾演阿姐汪明荃的兒子，問到與阿姐合作可有壓力？他說：「冇壓力！只要你唔遲到，背好稿就得。如果冇做功課阿姐會睇到，但有做功課佢會撐你，呢樣嘢令我好感動，仲會成日同我哋分享靚湯。」除了忙於藝人工作，Jonathan近日更榮升老闆，與網上產品平台推出產品。