敖嘉年日前應考電單車牌途中，突然殺出「程咬金」阻路，險「臨尾香」！雖然他成功一Take Pass，加上快將結婚「雙喜臨門」，未婚妻卻下旨禁買鐵騎！

敖嘉年考電單車牌成功一Take Pass，令他興奮莫名！

已持有貨車牌的敖嘉年，駕駛鐵騎同樣冇難度。

敖嘉年自爆被未婚妻禁買鐵騎，有牌都冇車揸！

無綫藝人敖嘉年在無綫劇《寒山潛龍》中飾演牛脾氣的神偷，原來現實中亦一樣愛追求刺激，繼成功考取貨車牌後，日前再向難度挑戰，應考電單車牌。他日前現身沙田香港駕駛學院，在最後階段的路試中，當他正想從大路駛入駕院時，突然有一輛私家車殺出，他險收掣不及，幸好最後有驚無險，安全過關。

自知發揮不錯的敖嘉年，事後與教練雞啄唔斷，在等待成績單時亦全程笑笑口，最後當然不負眾望，成功一Take Pass。提及剛才險埋門「撻Q」，他仍有餘悸的說：「好驚險，差唔多泊位前想出，點知突然間有架私家車衝入嚟，我即刻煞停，好彩我望到咋，如果唔係就慘！」

拍劇大派用場

他表示現時已考獲多種駕駛執照，希望日後拍劇時可大派用場：「學完電單車後，我差拖頭、巴士未有牌。希望第時拍嘢用得上，同埋拍遠鏡時，可以唔使用拖架、替身。」早前透露將與未婚妻拉埋天窗，今次考牌過關，可謂「雙喜臨門」，問到未婚妻可有鼓勵？敖嘉年笑說：「佢話：『你考好啦，唔好諗住買呀！』我呢度要攞個牌，攞到啦，返屋企又要攞多個牌，嗰個牌難考啲。（佢驚你有危險？）係呀！因為電單車體積小，好易發生意外。」