由劉嘉玲、梁家輝及謝君豪主演的舞台劇《杜老誌》昨晚正式公演，嘉玲昨午將綵排照片放上微博公開造型，老公梁朝偉、關之琳、張學友與羅美薇等圈中好友送上花牌祝賀。英皇集團主席楊受成以舞台劇出品人身份與太太陸小曼到場，楊生稱未看過綵排，故非常期待：「全城撲飛，希望可以繼續做落去，會加場，有諗過巡迴演出。（好多人搵你買飛？）好多，連劉嘉玲都搵我買飛，離晒譜，我話我冇飛。」對於旗下歌手古巨基結婚，他戥對方開心：「佢一落機就打畀我，佢除咗屋企人第一個通知我，佢哋拍咗20年拖唔容易，希望佢哋早生貴子。（賀禮？）同佢傾緊。（送現金？）睇佢鍾意乜。（任佢開條件？）我冇所謂。」

楊受成夫婦到場觀劇。

另外，昨晚是《杜老誌》的保良局慈善首演，「玩具大王」蔡志明太太蔡李惠莉以保良局副主席身份出席，她說：「今次好大卡士，好有信心做得好睇。」問到新抱汪圓圓待產情況，她說：「佢好好，圓圓同（蔡）加讚都買晒BB床、BB車同衫仔。」