日本殿堂級天后五輪真弓今晚舉行出道40周年演唱會，提早到港的她聯同相識多年的香港殿堂級天后徐小鳳及天后容祖兒茶敍，三位天后在尖沙咀海旁留倩影，小鳳姐和祖兒更表示一定會到會展欣賞演唱會。

祖兒（右）化身小粉絲，與五輪真弓在尖沙咀海旁合照。

小鳳姐（右）主動約五輪真弓之餘，更送花預祝好友的演出成功。

日本殿堂級創作天后五輪真弓今晚於會展舉行《五輪真弓40周年香港演唱會》，今次演唱會除日本之外，她選香港作為唯一一個海外演出：「好鍾意香港呢個城市，呢度有好多美食美景，而且香港嘅粉絲好熱情，非常期待今晚同闊別多年嘅香港粉絲見面！」與歌迷見面前，五輪真弓率先預留時間，與相識多年的老朋友徐小鳳及天后容祖兒相聚。

獻花諾捧場

多年前，小鳳姐將五輪真弓的歌曲改編成多首家傳戶曉的名曲，二人私下分屬好友！當知道五輪真弓來港演出，小鳳姐即時主動相約見面，更特地挑選可欣賞維港景色的酒店相聚：「五輪真弓好鍾意維港嘅景色，佢今次嚟香港住喺港島，喺九龍食飯就可以從另一個角度欣賞維港。」聚餐期間，小鳳姐送上鮮花預祝五輪真弓演唱會成功，又直言必定前往會展欣賞演唱會。

公司留靚飛

兩地天后的世紀相逢，成功吸引到新一代樂壇天后容祖兒湊熱鬧，專誠更改工作行程的祖兒更帶同最新專輯向五輪真弓請教，又即席與對方交流現今香港樂壇的發展趨勢，祖兒說：「32年前，五輪真弓嚟大球場開演唱會時已經好想去睇，但因為年紀仲細所以冇機會去，今次一知佢嚟香港開40周年演唱會，即刻叫公司幫我留最靚嘅飛，相信今次會吸引唔少行內朋友捧場！」三人其後到海旁欣賞海景，又以演唱會場地會展作背景合照。