隨着德國捧走世界盃，一眾球迷歷時近一個月的捱更抵夜睇波生活終告一段落，港姐黃心穎、華姐鄧佩儀、「波牛」馬國明、德國躉梁烈唯及美斯迷蔡卓妍等，對隨之而來冇波睇的日子，不禁叫苦連天！

對於世盃完結，黃心穎高呼失落！

鄧佩儀自爆要拿出早前於巴西拍攝的照片緬懷世界盃的日子。

蔡卓妍笑言世盃完結，令她終於有覺好瞓。

德國躉梁烈唯（左三）前晚出席世界盃活動，對於愛隊勝出極度興奮。

黃心穎、鄧佩儀及梁烈唯等前晚現身電視城《決賽森巴嘉年華》節目，心穎高呼不捨得世盃完結：「好失落！慣咗夜瞓，嚟緊夜晚冇人陪我傾偈，又要等4年，到時我快30歲！我想一生起碼親身去一次現場睇世界盃，下屆俄羅斯我好想去！想同公司自薦定先！（唔怕被熱情球迷強吻？）唔怕！到時我用拗腰頭槌化解，又或者到時係我更熱情呢！」而親赴巴西採訪世盃一個月的鄧佩儀透過電話說：「唔捨得世盃完，冇波睇嘅夜晚，我會睇番之前喺巴西影落嘅相，回憶同緬懷一下。（收情信最難忘？）嗰個人冇出現啦！反而識咗個韓國人，同我一樣好鍾意巴西，其實之前採訪阿根廷對荷蘭場波，有個上身冇着衫球迷，捉住我想錫落我個嘴度，好彩男同事幫我解圍，我冇嚇親，仲想公司下屆都搵我去俄羅斯！」

梁烈唯改睇戲

而德國躉梁烈唯說：「慣咗睇波成個月，依家冇，惟有改睇戲。（點調校生理時鐘？）之前有啲波我都係恰住眼瞓睇，醒咗再睇精華，所以唔使點校，依家夜晚都可以隨時瞓得着！」而「波牛」馬國明昨日出席活動時說：「之前我都唔係場場睇，世盃完咗，我都一樣係咁專心拍劇，因為我係拍劇為先，睇波只係有時間至睇！」

至於美斯迷蔡卓妍說：「終於可以早瞓啦！淘汰賽啲波好夜先踢。（阿根廷飲恨？）德國都實至名歸嘅，希望4年後我可以飛俄羅斯睇波啦！」