樂隊享樂團早前獲邀成為台灣天團五月天個唱暖場嘉賓，七子有幸親身感受偶像的舞台氣氛之餘，出道不久便踏出「第一步」向紅館舞台進發！

能被天團五月天賞識，享樂團坦言受寵若驚。

完成演出後，成員把握機會與五月天合照。

身為五月天超級粉絲的Don，與偶像握手後落下男兒淚。

首次在紅館演出的享樂團與偶像五月天近距離接觸，化身小粉絲的七子把握機會索偶像簽名及握手，主音旨呈笑說：「總共握咗35次手，我哋1人握5次，五月天就每人握7次！」Bass手Paul更踢爆另一主音Don感動落淚：「握晒手之後，Don忍唔住喊咗出嚟，因為佢係超級Fans！」

能夠在芸芸樂隊中脫穎而出，得到五月天賞識的成員亦識做地賣口乖：「多謝公司先，初初五月天想搵香港Band，但就唔識我哋，點知佢哋睇完好多樂隊資料，就揀咗我哋！」

共用一鼓

結他手Edward坦言當選一刻心情激動：「嗰刻冇喊，但驚到個心飛咗出嚟，覺得唔夠時間準備。」而鼓手Joe則緊張到空白一片：「表演完先覺得，原來做緊五月天嘉賓嘅感覺。咦，乜做完喇？」由於冠佑大方讓出私家鼓，造就Joe成為唯一一個可以跟五月天成員共用樂器的人，他對冠佑讚不絕口：「佢真係勁好人，嗰一刻覺得一陣佢會用番個鼓，所以唔可以打爛，不過我都冇留力，打3首歌應該唔會爛啩！但可以Share同一套鼓真係好興奮，佢個鼓啲聲靚啲！」