模特兒顧千瑩早前到泰國動物園搞搞震，仲膽大大騷擾正在熟睡的老虎仔，她大讚這班猛獸相當可愛，又笑言對老虎產生好感︰「老虎做我男友都唔錯，又可愛又可以保護我。」

Leona在老虎籠內搞搞震，「騷擾」正在熟睡的老虎仔。

Leona作狀咬老虎耳仔，十分得戚。

Leona為成年老虎洗白白，認真大膽。

早前到泰國取景拍攝處女寫真的模特兒顧千瑩（Leona K.），抽空於當地大玩一番，其中她到動物園遊覽時更有機會與猛獸老虎近距離接觸，令她興奮不已。當日Leona於老虎的「地頭」搞搞震，並於籠內「騷擾」正在熟睡的老虎仔，她見老虎仔不為所動，索性瞓地與牠合照又作狀咬耳仔，其後又為成年老虎洗白白，似乎不怕這頭猛獸襲擊她。

對猛獸印象改觀

雖然Leona相當大膽，但她笑言起初要去親親老虎時感到有點害怕，擔心老虎突然發難，會有生命危險︰「其實入去個籠嗰陣有啲驚，始終老虎有獸性，擔心佢哋會襲擊我，不過相處落原來佢哋好Nice。」她大讚老虎仔相當可愛，摸落軟綿綿相當舒服︰「佢哋啲毛好滑，所以當時好想攬實佢哋，不過唔想打擾佢哋休息，都係瞓喺隔籬影相算了。」

經過今次親親老虎之旅，Leona對這種猛獸改觀，更笑言已「有少少鍾意咗佢哋」︰「當日見完佢哋覺得唔夠喉，依家已經好掛住班老虎，曾經諗過有冇方法可以養佢哋，或者叫老虎做我男友，因為又可愛又可以保護我。」